BAKI, AzerVoice

ABŞ-da minlərlə insan Tramp administrasiyası və İlon Mask əleyhinə etiraz aksiyası keçirib.

AzerVoice xəbər evrir ki, bu gün ABŞ-ın müxtəlif ştatlarında minlərlə insan küçələrə çıxaraq Tramp administrasiyasının immiqrasiya siyasətinə və dövlət qulluqçularının kütləvi şəkildə işdən çıxarılmasına qarşı etiraz aksiyalarına qatılıb. Aksiyalar Demokrat fəallar və həmkarlar ittifaqları tərəfindən təşkil olunub və administrasiyanın son addımlarına, xüsusilə milyarder İlon Maskın hökumət daxilində artan nüfuzuna qarşı narahatlığın artdığı bir vaxtda keçirilib.

Aksiya təşkilatçıları verdikləri bəyanatda ABŞ prezidenti Donald Tramp və İlon Maskı bu ölkəyə öz mülkü kimi yanaşmaqda ittiham ediblər.

“Əllərinə keçən hər şeyi – sağlamlıq sistemimizi, məlumatlarımızı, iş yerlərimizi, xidmətlərimizi – ələ keçirməyə çalışırlar və bütün dünyaya meydan oxuyurlar. Bu artıq bir böhrandır və hərəkətə keçməyin vaxtıdır”, - deyə bəyanatda qeyd olunub.

Etiraz aksiyaları Vaşinqton, Boston, Los Anceles, Filadelfiya və Şimali Karolina kimi şəhərlərdə baş tutub. Etirazçılar “Oliqarxiyaya qarşı mübarizə”, “Bölücülüyə yox, birliyə dəstək” və “Əllərinizi iş yerlərimizdən çəkin” kimi plakatlar qaldırıblar.

Vaşinqtondakı aksiya zamanı çıxış edənlər arasında bir neçə Demokrat konqres üzvü və ABŞ Dövlət Qulluqçuları Federasiyası (AFGE) prezidenti Everet B. Kelli də olub.

“Səsimizi kəsə bilməzsiniz. Biz təslim olmayacağıq. Biz ayağa qalxıb deyəcəyik – ittifaqımızdan əllərinizi çəkin. Müqaviləmizdən əllərinizi çəkin. Demokratiyamızdan və azadlığımızdan əllərinizi çəkin”, – deyə Kelli bildirib.