BAKI, AzerVoice

İtaliyanın paytaxtı Romada Avropanın yenidən silahlandırılmasına qarşı genişmiqyaslı etiraz aksiyası keçirilib.

AzerVoice xəbər veirr ki, aksiyanın təşkilatçıları İtaliyanın müxalif partiyası olan “5 Ulduz Hərəkatı”-nın nümayəndələri olub.

Təşkilatçıların sözlərinə görə, yürüş və nümayişlərlə tamamlanan tədbirdə azı 80 min nəfər iştirak edib. “Yenidən silahlanmaya yox. Onları dayandıraq!” şüarı ilə keçirilən aksiyanı həmkarlar ittifaqları və vətəndaş hüquqları uğrunda mübarizə aparan bir sıra təşkilatlar dəstəkləyib.

Aksiyada İtaliya hökuməti və baş nazir Ciorcia Meloni, eləcə də Avropa Komissiyası tənqid hədəfinə çevrilib. “Onları dayandıraq” çağırışı Avropadakı hakim sinfə qarşı yönəlib. Bu çağırış səhiyyə və təhsil hüququna riayət olunmasının təmin edilməsi məqsədini daşıyır.

Qeyd edək ki, bu partiya Avropa Komissiyasının (AK) prezidenti Ursula fon der Lyayen tərəfindən irəli sürülmüş və Aİ ölkələrinin müdafiə üçün 150 milyard avroya qədər borc almasını nəzərdə tutan 800 milyard avroluq yenidən silahlanma planının əleyhinə səs verib.

Plana əsasən, Aİ ölkələri müdafiə sahəsində istifadə üçün 150 milyard avroyadək borc ala bilərdi. Milli səviyyədə isə partiya Ukraynaya silah tədarükünün davam etdirilməsinə qarşı çıxaraq danışıqlara və diplomatik həll yollarına çağırır.