AzerVoice

ABŞ prezidenti Donald Tramp ticarət müharibəsini gözlənilməz bir istiqamətə yönəldərək, tamamilə yaşayış olmayan torpaqlara da tariflər tətbiq edib.

AzerVoice xəbər verir ki, Antarktida yaxınlığında yerləşən və Avstraliyaya məxsus Heard və McDonald adaları Tramp administrasiyasının yeni tarif siyahısına daxil edilib.

Buzlaqlarla örtülü və yalnız pinqvinlərin məskunlaşdığı bu vulkanik adalarda heç bir insan yaşamasa da, ABŞ-ın ticarət tariflərinə tabe olan “ölkələr” siyahısına salınıb. Avstraliyanın baş naziri Entoni Albanese bu qərarı şərh edərək, “Yer üzündə heç bir yer təhlükəsiz deyil” ifadəsini işlədib.

Tramp administrasiyası Avstraliyanın digər xarici ərazilərinə də əlavə tariflər tətbiq edib. Kokos (Kiling) adaları, Milad adası və Norfolk adası yeni vergi siyahısına daxil edilib. Norfolk adası, cəmi 2188 nəfərlik əhalisinə baxmayaraq, ABŞ-ın Avstraliyaya tətbiq etdiyi 10%-lik tariflə müqayisədə əlavə 29% rüsumla üzləşib. 2023-cü ildə Norfolk adasının əsas ixracatı ABŞ-a satılan 413 min dollar dəyərində dəri ayaqqabılar olub.

Qeyd edək ki, Tramp administrasiyasının siyahısına düşən Heard və McDonald adalarından ABŞ-a “maşın və elektrik enerjisi” ixrac olunduğu barədə ticarət məlumatları da yayımlanıb. Lakin bu adalarda nə bina, nə də yaşayış məskəni olduğuna görə, bu idxal məlumatları çaşqınlıq yaradıb. Dünya Bankının məlumatlarına görə, ABŞ 2022-ci ildə bu adalardan 1,4 milyon dollar dəyərində idxal həyata keçirib. Halbuki, əvvəlki beş ildə bu məbləğ cəmi 15 min ilə 325 min dollar arasında dəyişirdi.

Ağ Ev, Avstraliya Xarici İşlər və Ticarət Departamenti, eləcə də Avstraliya Antarktika Bölməsi bu qərarla bağlı rəsmi şərh verməkdən yayınıb.