BAKI, AzerVoice
İsrailin təhlükəsizlik rəsmisi, Türkiyənin Suriyada hərbi baza qurması ehtimalını İsrail üçün potensial bir təhdid olaraq qiymətləndirib.
AzerVoice xəbər verir ki, bu barədə İsrailin The Jerusalem Post qəzeti məlumat yayıb.
Adı açıqlanmayan İsrail rəsmisi verdiyi açıqlamada bildirib ki, əgər Suriyada bir Türk hava bazası qurularsa, bu, İsrailin əməliyyat azadlığını məhdudlaşdırar.
Həmin rəsmi, İsrailin Suriyadakı hava hücumlarına maneə törədilməməsi üçün T4 hərbi bazasına hava zərbələri endirdiklərini etiraf edib. O bildirib ki, Suriya Prezidenti Əhməd Şaraya güvənmirlər.
“Onun həm qısamüddətli, həm də uzunmüddətli hədəfləri var. Uzunmüddətli hədəfi dəyişməyib – o bizim düşmənimizdir”, - deyə rəsmi vurğulayıb.
Bununla yanaşı rəsmi qeyd edib ki, İsrailin siyasi və təhlükəsizlik qurumları Türkiyənin Suriyada hərbi bazalar qurması ehtimalı səbəbilə xüsusi təhlükəsizlik iclasları keçirirlər.