BAKI,AzerVoice

Cənubi Afrikada yüzlərlə ağdərili şənbə günü ABŞ prezidenti Donald Trampa dəstək məqsədilə Pretoriyadakı Amerika səfirliyinin qarşısına toplaşıb. Onlar ölkə hökuməti tərəfindən irqçilik və ayrı-seçkiliyə məruz qaldıqlarını iddia ediblər.

Etirazçılar “Şükürlər olsun ki, Tramp prezidentdir” yazılmış plakatlar qaldırıb və Cənubi Afrika hökumətinin tətbiq etdiyi bəzi qanunların ağdərili azlığa qarşı ayrı-seçkilik xarakteri daşıdığını bildiriblər.

Trampın Əmrindən Sonra Gərginlik Artıb

"Associated Press" xəbər agentliyinin verdiyi məlumata görə, etirazçıların əksəriyyəti afrikaaner icmasına mənsubdur. Tramp keçən həftə verdiyi icra əmri ilə Cənubi Afrika hökumətinə yardımı dayandırmışdı. O, yeni torpaq islahatı qanununun əsasən holland mənşəli ağdəriləri hədəf aldığını bildirib.

Cənubi Afrika hökuməti isə yeni torpaq qanununun irqi ayrı-seçkiliklə bağlı olmadığını, Trampın açıqlamalarının isə həqiqəti əks etdirmədiyini bildirib. Rəsmi Pretoriya, torpaq islahatlarının keçmiş aparteid rejimi dövründə (1948-1994) yaranmış torpaq bölgüsü ədalətsizliyini düzəltməyə yönəldiyini vurğulayıb.

Qeyd edək ki, Cənubi Afrikada kənd təsərrüfatı torpaqlarının böyük hissəsi ağdərili fermerlərə məxsusdur. Halbuki, ölkə əhalisinin cəmi 7%-ni ağdərililər təşkil edir.