BAKI, AzerVoice

Rusiya xarici işlər naziri Sergey Lavrov İsrail ilə İran arasında elan olunan atəşkəslə bağlı ilk açıqlamasını verib.

AzerVoice xəbər verir ki, ABŞ Prezidenti Donald Trampın vasitəçiliyi ilə əldə olunduğu bildirilən atəşkəsin davamlılığına dair şübhələr olduğunu deyən Lavrov, hələlik yekun nəticə çıxarmağın tez olduğunu vurğulayıb.

“Hazırda hər hansı qəti nəticə çıxarmaq çox çətindir. Atəşkəs elan olunduqdan sonra belə, İsrail və İran arasında qarşılıqlı zərbələr barədə xəbərlər yayıldı. Ona görə gəlin, parçalanmış və təsdiqlənməmiş məlumatlar əsasında tələsik nəticələr çıxarmayaq” – deyə Lavrov bildirib.

Lavrovun bu açıqlaması bölgədə sabitliyin hələ də kövrək olduğunu və atəşkəsin real olaraq qüvvədə qalmasının qeyri-müəyyənliyini göstərir.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki qeydə alınmayıb, ciddi dağıntı da olmayıb.

ABŞ prezidenti Donald Trampın bəyanatına əsasən, İsrail və İran tam atəşkəsə razılıq veriblər. İsrail hakimiyyəti ABŞ-ın təklifini qəbul etdiyini və qarşıya qoyulan bütün məqsədlərə nail olunduğunu bəyan edib.