BAKI, AzerVoice

Vaşinqton Hindistan və Pakistan arasında ərazi mübahisəsinin həlli yollarını tapmağa çalışacaq.

AzerVoice xəbər verir ki, bu barədə ABŞ Prezidenti Donald Trampın verdiyi açıqlamada deyilir.

“Bu məsələ hələ müzakirə edilməsə də, mən hər iki böyük ölkə ilə ticarətin həcmini əhəmiyyətli dərəcədə artırmaq niyyətindəyəm. Bundan əlavə, ‘min illər’dən sonra Kəşmir üzrə bir həll yolu tapmağın mümkün olub-olmadığını anlamaq üçün hər ikinizlə işləyəcəyəm" – deyə, Tramp bildirib.

Qeyd edək ki, Hindistan-Pakistan münasibətləri 22 aprel tarixində Cammu və Kəşmirin Pahalgam bölgəsində törədilən terror aktından sonra gərginləşib. Hücum nəticəsində 25 hindistanlı və 1 Nepal vətəndaşı həlak olub. Mayın 7-nə keçən gecə Hindistan Silahlı Qüvvələri Pakistandakı bazalara zərbələr endirməyə başlayıb. Buna cavab olaraq, Pakistan hökuməti genişmiqyaslı “Banyan əl-Marsus” (“Qurğuşunla örtülmüş divar”) adlı hərbi əməliyyata başlayıb.

Ötən gün Hindistan və Pakistan atəşkəs rejimi barədə razılığa gəliblər. Hərbi danışıqların nəticəsi olaraq, tərəflər Hindistan standart vaxtı ilə saat 17:00-dan (Bakı vaxtı ilə 15:30) etibarən quru, hava və dənizdə silahlı əməliyyatları və atəşi dayandırmağa razılaşıblar. Lakin bu razılaşmadan bir neçə saat sonra Cammu və Kəşmirin bir neçə şəhərində, eləcə də Pəncab bölgəsində pilotsuz uçuş aparatları müşahidə olunub, hava hücumundan müdafiə sistemləri işə düşüb və elektrik enerjisi kəsilib.

Məlumat üçün bildirək ki, Kəşmir bölgəsi 1947-ci ildən Britaniya Hindistanının müstəqillik əldə edib dini əsaslarla iki dövlətə bölünməsindən bu yana Hindistan və Pakistan arasında mübahisəli olaraq qalır. Kəşmirdə dövlət sərhədi yoxdur, bölgə faktiki olaraq nəzarət xətti ilə iki yerə bölünüb. Hindistanın nəzarətində olan hissədə ölkədən ayrılmaq istəyən silahlı qruplar fəaldır. Yeni Dehli bu ekstremist qruplara Pakistandan dəstək gəldiyini iddia edir, İslamabad isə bu ittihamları rədd edir.