BAKI, AzerVoice

"Gec-tez İrana müdaxilə olacaq və bu zaman münaqişə region ölkələri, qismən Türkiyəni də cənginə alacaq".

AzerVoice xəbər verir ki, bunu Qaynarinfo-ya açıqlamasında siyasi şərhçi Rufiz Hafizoğlu İsrailin İrana hücuma hazırlıqla bağlı keçirdiyi təlimlərin ciddi bir niyyətə əsaslandığı, yoxsa sadəcə nəbz yoxlaması olduğu sualına cavabında deyib.

"Bu gün ölkəmizdə müxtəlif təbəqələr arasında belə bir fikir yaranıb ki, İsrailin İranı vurması guya Azərbaycanın da maraqlarına cavab verir. Əslində, İranın dağılması, orada xaosun yaranması Azərbaycanın da maraqlarına uyğun deyil. Suriyada Əsəd rejiminin çökməsindən sonra İran üzərinə təzyiqlər daha aktiv hala gəlib. Trampın yenidən hakimiyyətə gəlişindən sonra İrana maksimum təzyiq mexanizmi də işə salındı. İran da düşünüldüyü kimi, axmaq, sadəlövh dövlət deyil. İran məzhəb faktorundan istifadə edərək, xarici müdaxilələrə qarşı baryer yarada bilib", deyə Rufiz Hafizoğlu bildirib.

Bu baxımdan həmsöhbətimiz düşünür ki, İrana hər hansı bir müdaxilə, onun ərazilərinin vurulması proksi qüvvələrini aktiv hala gətirəcək:

"Ən güclü proksi qüvvələri də İraq və Livan ərazisində cəmləşib. Düşünürəm ki, İrana gec-tez müdaxilə olacaq. Amma Tramp hakimiyyəti maksimum çalışır ki, təzyiq mexnizmini işə salmaqla İranı ram etsin. Lakin İran da əlinin altındakı proksi qüvvələri vasitəsilə çalışır ki, qarşı tərəfə ciddi risklər yaratsın. Belə olduğu təqdirdə isə münaqişə sadəcə İran-İsrail-ABŞ üçbucağı arasında olmayacaq. Region ölkələri, qismən Türkiyəni belə cənginə alacaq".

Ekspert qeyd edir ki, İrana müdaxilə an məsələsidir:

"Proses danışıqlarla davam etdirilir, amma İrana müdaxilə an məsələsidir. Lakin buna qədər Amerika və İsrail İranın proksi qüvvələrini ən azından iflic halına gətirməlidir. "Hizbillah” və HƏMAS istisna olmaqla digər radikal qruplaşmalar hələ ayaq üstədir”.

Qeyd edək ki, Vaşinqtonla Tehran arasında danışıqların getdiyi bir ərəfədə İsrail Hərbi Hava Qüvvələri İrana mümkün hücuma hazırlıq məqsədilə təlimlərə başlayıb. Bununla bağlı İsrailin dövlət televiziyası KAN məlumat yayıb. Təlim İranın mümkün cavab tədbirləri üçün hazırlıqları da əhatə edib.

Xatırladaq ki, İran İsrailin zərbələrinə cavab olaraq 2024-cü ilin aprel və oktyabr aylarında bu ölkəyə raket zərbələri endirib. Düzdür, bu zərbələrin təsiri elə də güclü olmadı. Amma hər halda baş verənlər İranın da boş dayanmadığını göstərdi.

Hazırda isə ABŞ-la İran arasında danışıqlar gedir. Danışıqların iki raundu başa çatıb. Prosesin gedişi onların razılığa gələ biləcəyi ehtimalını artırır. Belə bir vəziyyətdə İsrail İrana mümkün hücuma hazırlıq məqsədilə təlimlərə başlayıb.