Hücum nəticəsində şəhərin sıx məskunlaşdığı ərazidə yerləşən yeddimərtəbəli bina demək olar ki, tamamilə dağılıb. "Camaa əl-İslami" qruplaşması verdiyi rəsmi bəyanatda hücumu "müharibə cinayəti" adlandırıb, lakin zərbə zamanı ölənlərin və ya yaralananların olmadığını bildirib.

Körfəz Əməkdaşlıq Şurasının (KƏŞ) Baş katibi Casim Məhəmməd əl-Budeyvi İranın KƏŞ ölkələrinə qarşı davam edən hərbi təcavüzünü ən kəskin şəkildə pisləyən rəsmi bəyanat yayıb. Riyad şəhərindəki Baş Katiblikdən verilən açıqlamada İranın mülki obyektləri və diplomatik missiyaları hədəf alması "qorxaqca və xaincə hücum" kimi qiymətləndirilib.

İsrailin müdafiə naziri İsrael Kats, ABŞ ilə ortaq şəkildə İrana qarşı başlatdıqları hücumların "lazım olduğu müddətcə" davam edəcəyi ilə hədələyib. Katsın sözlərinə görə, gecə saatlarında İsrail ordusu Tehranın strateji hədəflərini uğurla vurub. Nazir Kats sosial media hesabında etdiyi açıqlamada, İranın raket buraxılış gücünə və strateji infrastrukturuna ciddi zərər vurduqlarını iddia edib. O, bu əməliyyatların məqsədini belə izah edib: İranın hərbi potensialını məhv etmək, nüvə silahı və raket istehsalını dayandırmaq, həmçinin İran xalqının rejimi devirməsi üçün zəruri şərait yaratmaq. Kats həmçinin əlavə edib ki, İrandan sonra əsas diqqət Livana yönəldiləcək.

Səudiyyə Ərəbistanı Krallığının Xarici İşlər Nazirliyi milli vəzifələrini yerinə yetirərkən Küveyt Silahlı Qüvvələrinin iki üzvünün şəhid olması ilə əlaqədar Küveyt Dövlətinin hökumətinə və xalqına ən dərin hüznlə başsağlığı verib. Rəsmi bəyanatda Krallıq həyatını itirən hərbçilərin ailələrinə və yaxınlarına səmimi rəğbətini və həmrəyliyini ifadə edib. Səudiyyə Ərəbistanı bu ağır itki ilə bağlı Küveytin kədərini paylaşdığını və qardaş ölkənin yanında olduğunu vurğulayıb.

Qətər Daxili İşlər Nazirliyi tərəfindən məsələ ilə bağlı bəyanat yayılıb. Bəyanatda İrandan təşkil edilən hücumlar və ya bu hücumlara müdaxilə nəticəsində baş verən qəzalar zamanı hadisə yerinə toplaşmamağın vacibliyi bildirilib. Hadisə yerlərindən və sahədəki proseslərdən görüntü çəkərək sosial mediada paylaşmamağa diqqət yetirilməsi vurğulanan bəyanatda, bunun hüquqi nəticələri barədə xəbərdarlıq edilib. Bu növ hərəkətlərin rəsmi qurumların işinə mane olduğu və çevik müdaxiləni çətinləşdirdiyi ifadə edilib.

İranın ali rəhbəri Əli Xameneyinin tərəfdarları ilə İraq və ABŞ-ın maraqları arasında gərgin keçən İraq gecəsindən (bazar günü - bazar ertəsi gecəsi) sonra tərəflər şoku geridə qoyaraq qisas naminə atılan addımları bir qədər səngidiblər. Bazar ertəsinin gəlişi ilə belə görünür ki, İran İslam İnqilabı Keşikçiləri Korpusu (SEPAH) ilə əlaqələr bərpa olunana qədər "fraksiyaların reallığına" qayıtmaq və hamısı əlçatan olmaya biləcək "hədəflər bankı"nı daxil edən potensial uzunmüddətli müharibə planı hazırlamaq qərarı verilib.

"Hizbullah"ın hərbi qanadının bazar ertəsi sübh saatlarında İsrailə raket zərbələri endirməsi təşkilat daxilində siyasi rəhbərliyə qarşı qiyamın baş verməsini üzə çıxarıb. Livandakı diplomatik mənbələr hərbi qanadın bu addımının siyasi rəhbərliyin dövlət qarşısında götürdüyü "müharibəyə qoşulmamaq" öhdəliyini pozduğunu bildirir.

Qətər Müdafiə Nazirliyi ölkə ərazisini hədəf alan hava hücumlarının uğurla dəf edildiyi və dövlət suverenliyinin qətiyyətlə qorunduğu barədə rəsmi bəyanat yayıb. Rəsmi açıqlamada qeyd olunan faktlara əsasən, Qətərin Hava Hücumundan Müdafiə (HHM) sistemləri ölkə istiqamətinə atılan 7 ballistik raketi uğurla vuraraq zərərsizləşdirib. Eyni zamanda, Hərbi Hava və Hərbi Dəniz Qüvvələrinin koordinasiyalı fəaliyyəti nəticəsində 5 ədəd pilotsuz uçuş aparatı (PUA) məhv edilib.

Livanın Baş naziri Nəvaf Salam bu gün (bazar ertəsi) verdiyi bəyanatda hökumətin "Hizbullah"dan silahlarını təhvil verməyi və fəaliyyətini yalnız siyasi sahə ilə məhdudlaşdırmağı tələb etdiyini bildirib. Salam Beyrutda keçirilən Nazirlər Şurasının iclasından sonra çıxış edərək deyib: "Biz Livan ərazisindən raketlərin atılmasını pisləyirik. Bu, "Hizbullah"ın fəaliyyətinin qadağan edilməsini, onun silahlarını təhvil verməyə məcbur edilməsini və yalnız siyasi fəaliyyətə sadiqliyini tələb edir".

Səudiyyə Ərəbistanı ölkədəki Prins Sultan hava bazası yaxınlığında 5 pilotsuz uçuş aparatının (PUA) məhv edildiyini bildirib. Səudiyyə Ərəbistanı Müdafiə Nazirliyinin sözçüsü general-mayor Turki əl-Maliki verdiyi açıqlamada, Prins Sultan hava bazası yaxınlığında "5 düşmən PUA-sının" qarşısının alındığını və məhv edildiyini qeyd edib. Maliki açıqlamasında başqa təfərrüatlara yer verməyib.

Küveyt ordusu ABŞ-a məxsus bir neçə döyüş təyyarəsinin qəzaya uğradığını, bütün heyət üzvlərinin sağ xilas edildiyini bəyan etdi. Küveytli rəsmilər qəzadan dərhal sonra axtarış-xilasetmə əməliyyatlarına başlayıblar. Əməliyyat çərçivəsində təxliyə edilən bütün heyət üzvləri tibbi müayinə üçün xəstəxanaya göndərilib. Yaralıların sağlamlıq vəziyyətinin stabil olduğu bildirilir.

Səudiyyə Ərəbistanının "Aramco" şirkəti dron hücumuna məruz qaldıqdan sonra ehtiyat tədbiri olaraq Ras Tanuradakı neft emalı zavodunu bağlayıb. Məlumata görə, bu addım obyektin təhlükəsizliyini təmin etmək və dron zərbəsinin fəsadlarını qiymətləndirmək məqsədilə atılıb. Ras Tanura zavodu qlobal enerji bazarı üçün strateji əhəmiyyət kəsb edən mərkəzlərdən biri hesab olunur.