Livanın Təhsil və Ali Təhsil Nazirliyi ölkədəki mövcud hərbi vəziyyətlə əlaqədar rəsmi bəyanat yayıb. Açıqlamada bildirilir ki, can təhlükəsizliyi və fövqəladə təhlükəsizlik vəziyyəti nəzərə alınaraq, ölkə daxilindəki bütün özəl və dövlət məktəblərində, həmçinin peşə və texniki təhsil müəssisələrində təhsil müvəqqəti olaraq dayandırılıb. Nazirlik hadisələrin gedişatını anbaan izlədiyini və qərarların gündəlik təhlükəsizlik qiymətləndirmələrinə uyğun olaraq yenilənəcəyini vurğulayıb.

ABŞ Prezidenti Donald Tramp "The New York Times" qəzetinə verdiyi müsahibədə İrana qarşı hərbi kampaniyanın gələcək perspektivləri və Vaşinqtonun strateji hədəfləri barədə mühüm açıqlamalar verib.

İsrail ordusu (SAXAL) Livanın cənubunda "Hizbullah"ın yüksək rütbəli komandirlərindən birinə qarşı hücum həyata keçirdiyini elan edib.

Səudiyyə Ərəbistanı Xarici İşlər Nazirliyi İranın krallığa və bir neçə Körfəz dövlətinə qarşı həyata keçirdiyi son hücumlarla bağlı bu ölkənin səfiri Əli Rza Enayətini nazirliyə çağırıb. Səudiyyə Ərəbistanı Xarici İşlər Nazirliyi dövlət suverenliyinin hər hansı formada pozulmasını qəti şəkildə rədd etdiyini İran tərəfinin diqqətinə çatdırıb. Nazirlikdən verilən bəyanatda vurğulanıb ki, krallıq öz təhlükəsizliyini, ərazi bütövlüyünü və sabitliyini qorumaq üçün bütün zəruri və adekvat tədbirləri görmək hüququnu özündə saxlayır.

Körfəz Əməkdaşlıq Şurası (KƏŞ) Nazirlər Şurasının 50-ci fövqəladə iclası xarici işlər nazirlərinin iştirakı ilə öz işinə başlayacaq. Videokonfrans formatında təşkil olunacaq toplantıda İranın Şura üzvü olan dövlətlərə qarşı törətdiyi təcavüz aktları və regiondakı son təhlükəli proseslər müzakirə ediləcək.

Qətər Əmiri Şeyx Təmim bin Həməd Al Sani ilə Səudiyyə Ərəbistanının Vəliəhdi Şahzadə Məhəmməd bin Salman arasında telefon danışığı baş tutub. Danışıq zamanı regionda sürətlə inkişaf edən hadisələr və təhlükəsizlik vəziyyəti ətraflı müzakirə edilib.

Səudiyyə Ərəbistanı Krallığı İranın aşkar təcavüzünü və region dövlətlərinin suverenliyinin pozulmasını ən sərt formada pislədiyini bəyan edib. Rəsmi açıqlamada qeyd olunur ki, İranın Birləşmiş Ərəb Əmirlikləri, Bəhreyn, Qətər, Küveyt və İordaniyanın suverenliyini kobud şəkildə pozduğu vurğulanıb. Krallıq bəyanatında “qardaş ölkələrlə tam həmrəylik və sarsılmaz dəstək” ifadə olunub və həmin dövlətlərin atacağı istənilən addımı dəstəkləməyə hazır olduğu bildirilib. Riyad region dövlətlərinin təhlükəsizliyinin təmin olunması üçün bütün imkanlarını onların ixtiyarına verməyə hazır olduğunu təsdiqləyib.

İordaniya hökumətinin rəsmi sözçüsü ölkənin regionda baş verən genişmiqyaslı hərbi münaqişənin tərəfi olmayacağını bildirib. Bəyanatda vurğulanıb ki, İordaniya regional eskalasiyada tərəf olmayacağını bəyan edir, suverenliyinin heç bir halda pozulmasına icazə verməyəcəyini bildirir və vətəndaşlara sığınacaqlardan çıxa biləcəkləri açıqlansa da, ehtiyat tədbiri kimi həmin məkanların yaxınlığında qalmaları tövsiyə olunur.

Səudiyyə Ərəbistanı Xarici İşlər Nazirliyi İranın Körfəz ölkələrinə və region dövlətlərinə qarşı həyata keçirdiyi hücumlarla bağlı rəsmi mövqeyini açıqlayıb. Nazirliyin bəyanatında qeyd olunur ki, İranın Birləşmiş Ərəb Əmirliyi, Bəhreyn, Qətər və İordaniyanın suverenliyinə qarşı törətdiyi pozuntular və təcavüz aktları qətiyyətlə pislənir.

İraqın paytaxtının cənubunda yerləşən hərbi obyektə zərbə endirilib. Bağdadın cənub hissəsində yerləşən Həşdi-Şabi (Xalq Səfərbərlik Qüvvələri) komandanlıq qərargahı hava hücumuna məruz qalıb.

Səudiyyə Ərəbistanının paytaxtında bir neçə güclü partlayış səsi qeydə alınıb. Frans-Press (AFP) xəbər agentliyinin yaydığı məlumata əsasən, paytaxt Riyad şəhərində ardıcıl güclü partlayış səsləri eşidilib. Məlumata görə, partlayışlar dərhal təhlükəsizlik qüvvələrini hərəkətə keçirib. Şəhər sakinləri səmada silsilə partlayış izlərinin müşahidə edildiyini bildiriblər.

İsrail və ABŞ tərəfindən Iran ərazisinə endirilən zərbələrdən sonra Livan hökuməti ölkənin artan regional qarşıdurmaya sürüklənməsinin yolverilməz olduğunu bəyan edib. O, regionda baş verənləri “ciddi və təhlükəli inkişaflar” kimi qiymətləndirərək bütün siyasi qüvvələri və vətəndaşları məsuliyyətli davranmağa çağırıb.