BAKI,VOA Orxan Qədirzadə

İsrailin Baş naziri Benyamin Netanyahu ABŞ-a səfəri öncəsi gücləndirilmiş təhlükəsizlik tədbirləri altında ölkəni tərk edib. İsrail mətbuatının məlumatına görə, mümkün İran təhlükəsi səbəbindən baş nazirin təyyarəsinin uçuş vaxtı və havaya qalxdığı məkan ictimaiyyətə açıqlanmayıb.

İsrailin Kanal 12 telekanalının yaydığı məlumata əsasən, Netanyahu beş aylıq fasilədən sonra həyata keçirdiyi ABŞ səfəri zamanı standart prosedurlardan kənar təhlükəsizlik tədbirləri tətbiq olunub.

Məlumata görə, baş naziri daşıyan təyyarə Tel-Əvivdə yerləşən Ben-Qurion Beynəlxalq Hava Limanından deyil, Birüsseba şəhəri yaxınlığındakı Nevatim hərbi hava bazasından havaya qalxıb.

İddia olunur ki, marşrutun və uçuş detallarının məxfi saxlanılması İran tərəfindən yarana biləcək təhlükələrə qarşı ehtiyat tədbiri kimi həyata keçirilib.

Bundan başqa, Baş nazir Aparatı adətən olduğu kimi təyyarənin uçuş saatını əvvəlcədən açıqlamayıb. Netanyahu səfərdən əvvəl videomüraciət etsə də, həmin görüntülərin gecikdirilmiş şəkildə yayımlandığı bildirilir.

İsrail mediasının məlumatına görə, ABŞ səfərində Netanyahunu müşayiət edən jurnalist heyəti də olmayıb. Baş nazir Aparatı məsələ ilə bağlı rəsmi açıqlama verməyib.

Netanyahunun Vaşinqtonda ABŞ Prezidenti Donald Trump ilə görüşü planlaşdırılır. Baş nazir daha əvvəl bildirmişdi ki, görüşdə İran başda olmaqla regional təhlükəsizlik və digər aktual məsələlər müzakirə olunacaq.