BAKI,VOA,Yusif Şərifzadə

Livanın cənubunda yerləşən yaşayış məntəqələrinin dağıdılması təkcə maddi itkilərə deyil, həm də yerli əhali arasında dərin psixoloji sarsıntıya səbəb olur. Xüsusilə evlərini və doğma yurdlarını itirən insanlar uzunmüddətli qeyri-müəyyənliklə üz-üzə qalıblar.

VOA xəbər verir ki, 2025-ci ilin fevralında Livanın cənubundakı Naqura qəsəbəsində yaşayan Əli adlı sakin atəşkəsdən sonra evinin bünövrəsində yaranmış çatları, dağıdılmış meyvə bağlarını və zədələnmiş infrastruktur obyektlərini bərpa edəcəyinə ümid etdiyini bildirmişdi. Həmin vaxt İsrail ordusu atəşkəs razılaşması çərçivəsində qəsəbədən geri çəkilmişdi.

Məlumata görə, geri çəkilmədən sonra yaşayış evlərinin dağıdıldığı, məktəb binasının zədələndiyi və elektrik xətlərinin sıradan çıxarıldığı qeyd olunurdu. Buna baxmayaraq, sakinlər doğma yurdlarına qayıdaraq həyatı yenidən bərpa etməyə çalışırdılar.

Lakin aradan bir ildən çox vaxt keçməsinə baxmayaraq, Naqura qəsəbəsinin böyük hissəsinin tamamilə dağıdıldığı bildirilir. Qeyd olunur ki, Livanın cənubunda yerləşən bir sıra yaşayış məntəqələri də yaşayış üçün yararsız vəziyyətə düşüb.

Mütəxəssislər hesab edirlər ki, uzunmüddətli münaqişə nəticəsində evlərini itirən insanların psixoloji vəziyyəti getdikcə ağırlaşır. Onların fikrincə, fiziki dağıntılarla yanaşı, insanların təhlükəsizlik hissinin və gələcəyə inamının zəifləməsi də bölgənin əsas problemlərindən birinə çevrilib.