BAKI,VOA,Yusif Şərifzadə

Suriyanın keçid dövrü Prezidenti Əhməd əş-Şəraa ölkəsinin ərazi bütövlüyünün və sabitliyinin qorunmasına sadiq olduqlarını bəyan edib.

VOA xəbər verir ki, Əhməd əş-Şəraa Suriyanın xarici qüvvələrin planlarının həyata keçirildiyi məkan olmadığını bildirib.

Onun sözlərinə görə, Suriya nə xarici sui-qəsdlərin sınaq meydanıdır, nə də başqa dövlətlərin məqsədlərinin həyata keçirildiyi ərazidir.

Keçid dövrü Prezidenti İsrailin Suriya ərazisinə endirdiyi zərbələri də pisləyib. Bu açıqlama ölkənin cənub bölgələrində İsrailin hərbi əməliyyatlarının davam etdiyi bir vaxtda səsləndirilib.

Bundan əvvəl işğal altında olan Colan təpələri yaxınlığında yaşayan sakinlər təhlükəsizlik səbəbindən evlərini tərk etməyə məcbur olublar.

Suriyanın Xarici İşlər Nazirliyi İsrailin hücumlarını ölkənin suverenliyi və ərazi bütövlüyünün açıq şəkildə pozulması kimi qiymətləndirib.

Əhməd əş-Şəraa vurğulayıb ki, Dəməşq Suriyanın ərazi bütövlüyünün və sabitliyinin qorunması istiqamətində mövqeyini dəyişməyəcək.