BAKI,VOA,Yusif Şərifzadə

Qəzza şəhərində məcburi köçkün vəziyyətində yaşayan fələstinli Mərəm Sərsavi bölgədə elan olunmuş atəşkəsə baxmayaraq, insanların həyat şəraitinin yaxşılaşmadığını bildirib.

VOA xəbər verir ki, Mərəm Sərsavi ötən ilin oktyabr ayından qüvvədə olduğu bildirilən atəşkəsin gündəlik həyatda heç bir müsbət dəyişiklik yaratmadığını deyib.

Onun sözlərinə görə, müharibədən sonra vəziyyət dəyişməyib, əksinə, hər ötən gün daha da ağırlaşır. Sərsavi atəşkəs barədə deyilənlərin reallığı əks etdirmədiyini iddia edib.

Qəzza Səhiyyə Nazirliyinin məlumatına görə, ötən ilin oktyabr ayında əldə olunmuş atəşkəs razılaşmasından sonra bölgədə həyata keçirilən hücumlar nəticəsində 1 053 nəfər həlak olub, 3 406 nəfər isə yaralanıb.

Mərəm Sərsavi bildirib ki, beynəlxalq ictimaiyyətin diqqətinin Qəzzadan yayınması bölgə sakinlərini daha çox narahat edir. Onun sözlərinə görə, əsas xidmətlərə çıxışın məhdud qalması və hücumların davam etməsi insanların bu vəziyyətin uzunmüddətli olacağından ehtiyatlanmasına səbəb olur.

Buna baxmayaraq, o, təhsilini davam etdirdiyini və gələcəyə ümidini itirmədiyini vurğulayıb.