BAKI,VOA,Yusif Şərifzadə

İsrail ordusu və yəhudi məskunlaşmaçıların işğal altındakı İordan çayının qərb sahili və Şərqi Qüdsdə əməliyyatları davam edir.

VOA xəbər verir ki, Fələstinin Vəfa xəbər agentliyinin yaydığı məlumata görə, son saatlarda bölgənin müxtəlif yaşayış məntəqələrində bir sıra insidentlər qeydə alınıb.

Məlumata əsasən, Ramallah şəhərinin şərqində yerləşən Burqa kəndində məskunlaşmaçılar zeytun və badam ağaclarının olduğu kənd təsərrüfatı sahələrini yandırıblar.

Bundan başqa, İsrail qüvvələrinin Qüdsdəki Əl-Əqsa məscidi yaxınlığında bir fələstinlini döyərək saxladığı bildirilib.

Həmçinin İsrail hərbçiləri və məskunlaşmaçıların gecə saatlarında Əl-Xəlilin qədim şəhərində yerləşən Əl-Rəs məscidinə basqın etdiyi, ibadət edən şəxslərə zor tətbiq etdikdən sonra məscidi bağladıqları qeyd olunub.

Məlumata görə, Qüdsün şimalında yerləşən Muxmas qəsəbəsində məskunlaşmaçılar yeni yaşayış məntəqəsi yaratmaq məqsədilə fələstinlilərə məxsus torpaq sahələrini dağıdırlar.

Eyni zamanda, Ramallahın şimal-qərb kəndlərində məskunlaşmaçıların fələstinlilərə məxsus avtomobillərə hücum etdiyi bildirilir.