BAKI,VOA,Yusif Şərifzadə
İsrailin Livanın müxtəlif bölgələrinə endirdiyi zərbələr nəticəsində həlak olanların sayı artaraq 32 nəfərə çatıb.
VOA xəbər verir ki, Livanda atəşkəs səylərinin davam etməsinə baxmayaraq, İsrail ordusunun ölkənin müxtəlif ərazilərinə hücumları davam edir.
Livanın Milli Xəbər Agentliyinin məlumatına görə, Qərbi Beka bölgəsinin Sohmor yaşayış məntəqəsində bir evə endirilən zərbə nəticəsində eyni ailədən dörd nəfər həlak olub, bir nəfər isə yaralanıb.
Məlumatda qeyd olunur ki, dağıntılar altında qalan bir uşağın xilas edilməsi istiqamətində axtarış-xilasetmə işləri davam etdirilir.
Livanın Səhiyyə Nazirliyinin Təcili Əməliyyatlar Mərkəzi isə Sidon bölgəsinin Qanarit yaşayış məntəqəsinə endirilən zərbə nəticəsində azı yeddi nəfərin öldüyünü, 13 nəfərin yaralandığını açıqlayıb.
Rəsmilər bildirirlər ki, bu rəqəmlər ilkin məlumatlardır və axtarış-xilasetmə işləri başa çatdıqdan sonra itkilərin sayı arta bilər.