BAKI,VOA,Yusif Şərifzadə

Livanın Mədəniyyət Nazirliyi İsrailin ölkənin tarixi və mədəni irs obyektlərinə qarşı hücumlarını qəti şəkildə pisləyib.

VOA xəbər verir ki, nazirliyin yaydığı bəyanatda Livanın cənubunda yerləşən Sur şəhərinin bəşəriyyətin ortaq mədəni irsinin mühüm hissəsi olduğu vurğulanıb.

Bəyanatda qeyd olunub ki, beş min ildən artıq tarixə malik olan Sur şəhəri öz tarixi, mədəni və simvolik əhəmiyyətinə görə dünya irsinin ayrılmaz tərkib hissəsidir.

Nazirlik bildirib ki, bu cür abidələrin qorunması yalnız Livanın deyil, bütün beynəlxalq ictimaiyyətin məsuliyyətidir.

Açıqlamada İsrail ordusunun Livanın cənub bölgələrinə dəfələrlə hücum etdiyi və bəzi tarixi abidələrin də zərər gördüyü qeyd olunub.

Məlumata görə, hücumlara məruz qalan obyektlər arasında orta əsrlərə aid məşhur Bofor qalası da var.

Livanın Mədəniyyət Nazirliyi Sur şəhərinin 1984-cü ildən etibarən UNESCO-nun Dünya İrs Siyahısında yer aldığını xatırladıb.

Həmçinin bildirilib ki, şəhərə 2024-cü ilin noyabr ayında silahlı münaqişələr zamanı mədəni irsin qorunmasına dair beynəlxalq mexanizmlər çərçivəsində gücləndirilmiş mühafizə statusu verilib.

Nazirlik beynəlxalq təşkilatları və UNESCO-nu Livanın mədəni irs obyektlərinin qorunması üçün təxirəsalınmaz addımlar atmağa çağırıb.