BAKI,VOA,Yusif Şərifzadə

İşğal altındakı İordan çayının qərb sahilində və Şərqi Qüdsdə gərginlik davam edir.

VOA xəbər verir ki, dünyanın diqqəti ABŞ ilə İran arasında əldə olunmuş atəşkəsə yönəldiyi bir vaxtda, bölgədə İsrail ordusunun əməliyyatları və yəhudi məskunlaşmaçılarının fəaliyyətləri ilə bağlı yeni hadisələr qeydə alınıb.

Fələstin Xəbər Agentliyinin məlumatına görə, İsrail qüvvələri Ramallah şəhərinin şərqində yerləşən Silvad və Əl-Məzraa əş-Şərqiyyə qəsəbələrində keçirdikləri reyd zamanı bir fələstinli qadını saxlayıb və üç nəqliyyat vasitəsini müsadirə edib.

Məlumatda bildirilir ki, Nablus şəhərinin cənubunda yerləşən Eynabus kəndində bir neçə evə daxil olan məskunlaşmaçılar qoyunları oğurlayıblar. Həmçinin Nablusun şimal-qərbində yerləşən Məsudiyyə ərazisində kənd təsərrüfatı sahələrinə ziyan vurulduğu qeyd olunub.

Digər hadisədə isə Tubas şəhərinin cənub-şərqində yerləşən Atuf kəndinə daxil olan məskunlaşmaçıların bir qrup fermerə fiziki zorakılıq tətbiq etdiyi və onları gecə saatlarında saxladığı bildirilib.

Bölgədə baş verən hadisələr fonunda fələstinlilərə qarşı təzyiqlərin və torpaq mübahisələrinin davam etdiyi qeyd olunur.