BAKI,VOA,Yusif Şərifzadə

Livanın cənubunda İsrail ordusu ilə Hizbullah arasında qarşıdurmaların davam etdiyi bildirilir. Hizbullah son əməliyyatlarla bağlı bir sıra iddialar irəli sürüb.

VOA xəbər verir ki, Hizbullah yaydığı bəyanatda Livanın cənubunda İsrail ordusuna məxsus hərbi texnika, mövqelər və şəxsi heyətin yerləşdiyi nöqtələrə qarşı bir neçə hücum həyata keçirdiyini açıqlayıb.

Qrupun məlumatına görə, Hadatha bölgəsində yerləşən Əl-Baraka ərazisində İsrail ordusuna məxsus D9 tipli buldozer və hərbi nəqliyyat vasitəsi partlayıcı qurğularla hədəfə alınıb.

Bəyanatda həmçinin qeyd olunur ki, Qantara şəhərinin mərkəzində İsrail hərbçilərinin və texnikasının toplandığı ərazi raket atəşinə tutulub.

Hizbullah Hadatha yaxınlığında irəliləyən İsrail hərbi maşınlarının artilleriya zərbələri nəticəsində geri çəkilməyə məcbur olduğunu da iddia edib.

Təşkilatın açıqlamasında Yahmar əl-Şaqif şəhərində bir Merkava tankının vurulduğu və zərbə nəticəsində yanaraq sıradan çıxdığı bildirilib.

Bundan əlavə, Hizbullah “Camel Tiger” adlandırdığı yeni İsrail mövqeyinə pilotsuz uçuş aparatları vasitəsilə hücum həyata keçirdiyini açıqlayıb.

İsrail tərəfi isə Hizbullahın səsləndirdiyi iddialarla bağlı hələlik rəsmi açıqlama verməyib. Buna görə də məlumatların müstəqil mənbələr tərəfindən təsdiqlənmədiyi qeyd olunur.