BAKI,VOA,Yusif Şərifzadə

İsrailin Baş naziri Benyamin Netanyahu ordunun Qəzza zolağında nəzarət etdiyi ərazilərin daha da genişləndirilməsi barədə göstəriş verdiyini açıqlayıb.

VOA xəbər verir ki, Netanyahu İsrail ordusunun mərhələli şəkildə Qəzza zolağında nəzarət sahəsini artırdığını və ilkin hədəfin ərazinin təxminən 70 faizinə çatmaq olduğunu bildirib.

Baş nazir qeyd edib ki, İsrail qüvvələri hazırda Qəzza ərazisinin təxminən 64 faizinə nəzarət edir və əməliyyatlar addım-addım davam etdirilir.

“Biz 50 faizdən 60 faizə keçdik. Mənim göstərişim budur ki, 70 faizə qədər gedək. Gəlin addım-addım irəliləyək,” — deyə Netanyahu bildirib.

O əlavə edib ki, İsrail HƏMAS-a qarşı müxtəlif istiqamətlərdən təzyiq göstərməyə davam edəcək və “qalan qruplarla” mübarizə də davam etdiriləcək.

Məlumata görə, Qəzza zolağında mülki əhali artıq sahil boyunca dar ərazilərə sıxışdırılıb və bölgədə genişmiqyaslı dağıntılar davam edir.

Humanitar təşkilatlar xəbərdarlıq edirlər ki, hərbi əməliyyatların genişlənməsi Qəzzada onsuz da ağır olan humanitar vəziyyəti daha da pisləşdirə bilər.