BAKI,VOA,Yusif Şərifzadə

Livanın cənubunda yerləşən Nəbatiyyə şəhəri uzun illərdir regionun ən mühüm yaşayış və ictimai mərkəzlərindən biri kimi tanınır. Son günlər şəhərlə bağlı yayılan təxliyə çağırışları və təhlükəsizlik vəziyyətinin gərginləşməsi Nəbatiyyəni yenidən diqqət mərkəzinə gətirib.

VOA xəbər verir ki, İsrail ordusu ardıcıl ikinci gündür təxminən 80 min əhalisi olan şəhərin sakinlərinə evlərini tərk etmələri və Zəhrani çayının şimalına keçmələri ilə bağlı çağırış edib.

Məlumata görə, Livanın müxtəlif bölgələrində davam edən hərbi əməliyyatlar və dağıntılar fonunda Nəbatiyyə şəhəri tarixi keçmişi və uzunmüddətli müqavimət ənənəsi ilə yenidən gündəmə çıxıb.

Nəbatiyyə uzun illərdir Livanın cənubunda siyasi, iqtisadi və ictimai həyatın əsas mərkəzlərindən biri hesab olunur. Şəhər İsrail–Livan qarşıdurmaları dövründə dəfələrlə hərbi əməliyyatlara və bombardmanlara məruz qalıb.

Bununla yanaşı, şəhər sakinləri uzun illər ərzində bölgəni tərk etməmək və həyatlarını davam etdirmək mövqeyi ilə seçilib.

Tarixi mənbələrə görə, Nəbatiyyə həm Osmanlı dövründə, həm də sonrakı regional münaqişələr zamanı müxtəlif təzyiq və qarşıdurmalarla üzləşib. Buna baxmayaraq, şəhər Livanda dözümlülük və müqavimət ruhunun simvollarından biri kimi qəbul olunur.

Son təxliyə çağırışları isə Livanın cənubunda humanitar vəziyyətin daha da ağırlaşması ilə bağlı narahatlıqları artırır.