BAKI,VOA,Yusif Şərifzadə

Livanın cənubunda atəşkəsin qüvvədə qalmasına dair gözləntilərə baxmayaraq, bölgədə gərginlik davam edir. İsrailin həyata keçirdiyi intensiv hava zərbələri nəticəsində azı ondan çox insan həyatını itirib.

VOA xəbər verir ki, hadisə ilə bağlı ölən və yaralananların sayı davamlı olaraq yenilənir və rəqəmlərin artdığı bildirilir.

Livan Mülki Müdafiə Xidməti və digər təcili yardım qrupları Saksakiyeh bələdiyyəsində dağıntılar altında qalan şəxslərin xilas edilməsi üçün əməliyyat aparırlar. İlkin məlumata əsasən, zərbə nəticəsində azı yeddi nəfərin meyiti dağıntılar altından çıxarılıb.

Bundan əlavə, ən azı beş yaralı xilas edilərək tibbi yardım göstərilməsi üçün aidiyyəti qurumlara təhvil verilib.

Hazırda dağıntılar altında qaldığı ehtimal olunan daha altı nəfərin axtarışları davam etdirilir. Bildirilir ki, hədəfə alınan bina bir neçə məcburi köçkün ailəsinin yaşadığı yaşayış binası olub.

Livanın cənubunda baş verən hadisə bölgədə növbəti faciə kimi qiymətləndirilir. İsrailin ölkə ərazisində davam etdirdiyi hava hücumları nəticəsində bir gün ərzində yenidən onlarla insanın həyatını itirdiyi qeyd olunur.