BAKI,VOA Orxan Qədirzadə

Amerika Birləşmiş Ştatları İsrailə bildirib ki, Livan ilə atəşkəs İranla bağlı hər hansı inkişafdan asılı olmayaraq qüvvədə qalacaq.

VOA xəbər verir ki, məlumata görə, bu barədə İsrailin 12-ci televiziya kanalı adları açıqlanmayan mənbələrə istinadən xəbər yayıb.

Qeyd olunur ki, İsrail ilə Livanda fəaliyyət göstərən Hizbullah arasında aprelin 17-dən etibarən atəşkəs qüvvədə olsa da, tərəflər arasında gərginlik davam edir. Daha sonra Vaşinqtonda Livan və İsrail səfirləri arasında keçirilən birbaşa danışıqlardan sonra razılaşma uzadılıb.

Buna baxmayaraq, İsrail ordusu xüsusilə Livanın cənub bölgələrinə zərbələr endirməyə davam edir ki, bu da ölən və yaralananların sayının artmasına səbəb olur. Eyni zamanda, Hizbullah da Livanın cənubunda İsrail qüvvələrinə qarşı əməliyyatlar həyata keçirir, həmçinin işğal olunmuş ərazilərə raket və pilotsuz uçuş aparatları buraxır.

Məlumata əsasən, martın 2-dən etibarən İsrailin Livana endirdiyi zərbələr nəticəsində 2600-dən çox Livan vətəndaşı həlak olub, 1 milyondan artıq insan isə məcburi köçkün vəziyyətinə düşüb.