BAKI,VOA, Nailə Babazadə

İraqın Koordinasiya Çərçivəsi daxilindəki rəqabət yeni Baş nazirin təyin edilməsi prosesində siyasi dalana səbəb olub. Blok daxilində həm seçim mexanizmi həm də nazirlik postlarının bölünməsi ilə bağlı ciddi fikir ayrılıqları davam edir.

VOA xəbər verir ki, mənbələrin verdiyi məlumata görə son günlərdə bir neçə dəfə təxirə salınan iclasda üzv blokların seçki çəkisi və ya bütün tərəflərin qəbul edəcəyi kompromis namizəd üzərində razılığa gəlmək cəhdləri göstəriləcək.

Hakim koalisiya əvvəlki iki iclasda aparıcı namizədlər arasında səslərin bərabər bölünməsi səbəbindən vahid namizəd müəyyən edə bilməyib. Siyasi mənbələr konstitusiya müddətinin yaxınlaşması səbəbindən qərarın yaxın saatlarda verilə biləcəyini ehtimal edirlər. Növbəti şənbə günü son möhlət hesab olunur və bu gecikmənin artıq seçici kütləsi arasında mənfi təsir yaratdığı vurğulanır.

Əgər alyans seçki çəkisi meyarına üstünlük versə hazırkı Baş nazir Məhəmməd Şia əl-Sudaninin dəstəklədiyi İhsan əl-Avadinin şansları daha yüksək qiymətləndirilir. Lakin qərar blok rəhbərliyinin daxili səsverməsi ilə məhdudlaşsa rəqabətin Bəssəm əl-Bədrinin xeyrinə dəyişə biləcəyi qeyd olunur. Mübahisə yalnız namizəd seçimi ilə bitmir bəzi fraksiyalar öz dəstəklərini gələcək hökumətdəki nazirlik paylarının həcmi ilə şərtləndirirlər.

Prezident Nizar Amidi seçildikdən sonra başlayan hökumət qurma prosesi üçün qoyulan rəsmi vaxt aprelin iyirmi dördündə sona çatır. Nuri əl-Maliki və Heydər əl-Abadi kimi sabiq Baş nazirlərin rəhbərlik etdiyi ittifaqları birləşdirən Koordinasiya Çərçivəsi daxilindəki bu gərginlik şiə düşərgəsindəki kövrək birliyi və siyasi maraqlar arasındakı uçurumu bir daha üzə çıxarıb.