BAKI,VOA, Nailə Babazadə

Livan Prezidenti Jozef Avnın İsrailin Livana qarşı hücumlarını davam etdirməsi səbəbindən İsrailin Baş naziri Benyamin Netanyahu ilə görüşməkdən imtina etdiyi bildirilib.

VOA xəbər verir ki, Livanlı bir mənbənin İsrailin "Haaretz" qəzetinə verdiyi məlumata görə, Avn hücumlar fonunda və görüşün məqsədi qeyri-müəyyən qaldığı bir vaxtda belə bir təmasın Livan daxilində ciddi etirazla qarşılanacağının fərqindədir.

Mənbə qeyd edib ki, Netanyahu ilə görüşmək Livanın daxili siyasətini mürəkkəbləşdirə bilər. Avnın imtina qərarına əsas səbəb kimi İsrailin hərbi əməliyyatları dayandırmaması, həmçinin görüşlə bağlı məlumatların İsrail tərəfindən mətbuata sızdırılması göstərilir. Livanlı rəsmi bildirib ki, Netanyahu və Tramp bu görüşü sadəcə "ictimaiyyətlə əlaqələr" (PR) məqsədilə istəyirlər. O, ölkənin hələ də atəş altında olduğunu və kəskin daxili qütbləşmə şəraitində prezidentin heç bir nəticəsi olmayacaq bir prosesdə iştirak edə bilməyəcəyini vurğulayıb.

Xatırladaq ki, İsrailin İnnovasiya, Elm və Texnologiya naziri Gila Qamliel iki lider arasında görüşün baş tutacağını iddia etmişdi. Lakin Anadolu Agentliyinə (AA) danışan Livanın rəsmi mənbələri tərəflər arasında hər hansı telefon danışığı və ya görüş planı barədə məlumata malik olmadıqlarını bildiriblər.