BAKI,VOA, Nailə Babazadə

İsrail müxalifətinin lideri Yair Lapid çərşənbə günü İranla əldə olunan atəşkəs razılaşmasını kəskin tənqid edərək, bunu "görünməmiş siyasi fəlakət" adlandırıb. Lapid Baş nazir Benyamin Netanyahunu müharibənin hədəflərinə çatmaqda uğursuzluğa düçar olmaqda ittiham edib.

VOA xəbər verir ki, Lapid "X" (keçmiş Twitter) hesabında paylaşdığı bəyanatda İsrailin strateji maraqlarının kənarda qaldığını vurğulayıb.

"Tariximizdə heç vaxt belə bir siyasi fəlakət baş verməyib. Milli təhlükəsizliyimizin mahiyyətinə aid qərarlar qəbul edilərkən İsrail hətta danışıqlar masasına yaxın belə buraxılmayıb. Ordu ona tapşırılan hər şeyi yerinə yetirdi, xalq inanılmaz möhkəmlik nümayiş etdirdi, lakin Netanyahu siyasi və strateji cəhətdən uğursuzluğa düçar oldu; o, qarşıya qoyduğu hədəflərin heç birinə çatmadı."-deyə o qeyd edib.

İsrail hökuməti rəsmən bildirib ki, ABŞ Prezidenti Donald Trampın İrana qarşı zərbələri iki həftə müddətinə dayandırmaq qərarını dəstəkləyir. Lakin Təl-Əviv bu razılaşmanın Livanı əhatə etmədiyini qəti şəkildə vurğulayıb.

“İran Hörmüz boğazını dərhal açmalı, ABŞ, İsrail və region ölkələrinə qarşı bütün hücumları dayandırmalıdır.İsrail ABŞ-ın İranın nüvə, raket və terror təhdidinin aradan qaldırılması səylərini dəstəkləyir.”-deyə Netanyahunun ofisindən verilən bəyanatda deyilib.