BAKI,VOA, Fərid Mikayılov

Livan Xarici İşlər Nazirliyi rəsmi Tehranın diplomatik davranış qaydalarını kobud şəkildə pozmasını əsas gətirərək, İranın bu ölkədəki səfirinin fəaliyyətinə xitam verib.

VOA xəbər verir ki, Rəsmi Beyrut iranlı diplomatın ölkəni tərk etməsi üçün bazar gününə qədər vaxt qoyub.

Livan XİN-in yaydığı rəsmi bəyanatda diplomatik gərginliyin pik həddə çatdığını göstərən üç mühüm addım açıqlanıb.

İranın işlər vəkilinə məlumat verilib ki, səfirin akkreditasiyasına verilən razılıq geri çağırılıb və o, "arzuolunmaz şəxs" (persona non grata) elan edilib. Təyin olunmuş İran səfirindən gələn bazar gününə qədər Livan ərazilərini dərhal tərk etməsi tələb olunub.

Livanın Tehrandakı səfiri İran tərəfinin diplomatik etika və normaları pozması fonunda məsləhətləşmələr üçün geri çağırılıb.

Livanın bu kəskin addımı İranın ölkənin daxili işlərinə müdaxiləsi və "Hizbullah" vasitəsilə apardığı siyasətin rəsmi Beyrut tərəfindən artıq qəbul edilməməsi kimi qiymətləndirilir. Xüsusən də regionda davam edən müharibə və Tehranın Livanın suverenliyini təhlükəyə atan bəyanatları bu qərarın əsas hərəkətverici qüvvəsi olub.

Bu hadisə İranın ərəb dünyasındakı, xüsusən də uzun illərdir ən güclü qalası hesab edilən Livandakı nüfuzuna vurulan ən böyük diplomatik zərbələrdən biri hesab olunur.