BAKI,VOA, Nailə Babazadə

Suriya ordusu bazar ertəsi günü ölkənin şimal-şərqindəki hərbi bazalarından birinin qonşu İraq ərazisindən raket atəşinə tutulduğunu açıqlayıb. İraq rəsmiləri isə hücumun arxasında yerli silahlı qruplaşmanın dayandığını bildiriblər.

VOA xəbər verir ki, Suriya ordusunun bəyanatında qeyd olunur ki, Haseke əyalətinin Əl-Yarubiya qəsəbəsi yaxınlığındakı hərbi baza raket zərbələrinə məruz qalıb. Adının açıqlanmasını istəməyən İraq rəsmisi isə bildirib ki, yerli qruplaşmalardan biri Haseke bölgəsindəki bazaya doğru "Qrad" raketinin təkmilləşdirilmiş versiyası olan yeddi ədəd "Arash-4" raketi atıb.

Məlumata görə, İraqın şimalındakı Rəbia bölgəsində, Suriya sərhədi yaxınlığında tərk edilmiş raket qurğusu aşkar edilib. Hücuma məruz qalan Rmeylan bazası bu ayın əvvəlində anti-İŞİD beynəlxalq koalisiyasının geri çəkilməsindən sonra Suriya ordusunun nəzarətinə keçmişdi.
İraq tərəfi ilə koordinasiya

Suriya hərbi rəhbərliyi hadisə ilə bağlı İraq tərəfi ilə əlaqə saxladıqlarını və İraq ordusunun günahkarların tapılması üçün axtarış əməliyyatına başladığını təsdiqləyib. Suriya Müdafiə nazirinin şərq bölgəsi üzrə müavini Sipan Hamo hücumu pisləyərək bildirib:

"Biz bu hadisəyə görə birbaşa İraq hakimiyyətini məsuliyyətli tuturuq. Onlar öz ərazilərinə nəzarət edə bilməməklə təhlükəsizliyimizə təhdid yaradan hücumların qarşısını almayıblar."

Hücum nəticəsində can itkisinin olmadığı, yalnız maddi ziyan dəydiyi qeyd edilib. Xatırladaq ki, İraq fevralın 28-də ABŞ və İsrailin İrana qarşı başlatdığı genişmiqyaslı hava hücumlarından sonra regionda yaranan gərginliyin mərkəzinə çevrilib. İranyönümlü qruplaşmalar bölgədəki ABŞ maraqlarına qarşı demək olar ki, hər gün hücumlar təşkil edirlər.