BAKI, VOA , Nailə Babazadə
Yaxın Şərqdə 2026-cı ilin fevral ayından başlayan hərbi gərginlik mart ayının ortalarında ən kritik həddinə çatıb. İsrail ordusu Livandakı hərbi kampaniyasını genişləndirərək paytaxt Beyrutun mərkəzi məhəllələrinə silsilə hava zərbələri endirməyə başlayıb.
VOA xəbər verir ki, Livan Səhiyyə Nazirliyinin son məlumatına görə, Basta və Zoqaq əl-Blat rayonlarına endirilən zərbələr nəticəsində 10 nəfər həlak olub, 27 nəfər yaralanıb. Bu hücumlar paytaxtın indiyədək toxunulmaz sayılan ərazilərinin də hədəfə alınması ilə "Beyrut istisnası"nın sona çatdığını göstərir. Eyni zamanda, Livanın cənub və şərq bölgələrində, xüsusilə Bekaa vadisində yaşayış binalarının vurulması nəticəsində ölənlərin ümumi sayı 900-ü keçib, 1 milyondan çox insan isə məcburi köçkünə çevrilib.
Digər tərəfdən, İsrail İranın hərbi və siyasi elitasına qarşı silsilə suiqəsd əməliyyatlarını davam etdirir. İsrailin Müdafiə naziri İsrail Kats İranın Kəşfiyyat naziri İsmayıl Xatibin gecə əməliyyatı ilə zərərsizləşdirildiyini elan edib. Buna cavab olaraq İranın xarici işlər naziri Abbas Əraqçi bildirib ki, Tehran geri addım atmayacaq və müvəqqəti atəşkəs təkliflərini qəbul etmir. Əraqçi qeyd edib ki, müharibənin tamamilə dayandırılması və İranın çəkdiyi zərərin ödənilməsi (təzminat) şərti ilə istənilən təklifi müzakirə etməyə hazırdırlar. O, həmçinin İranın yeni lideri Müctəba Xameneinin səhhətinin yaxşı olduğunu və idarəetmə sisteminin sarsılmadığını vurğulayıb.
Münaqişə qonşu ölkələrin enerji infrastrukturuna da ciddi təsir göstərir. Səudiyyə Ərəbistanı və Birləşmiş Ərəb Əmirlikləri (BƏƏ) öz ərazilərinə yönələn raket və PUA hücumlarının qarşısını aldıqlarını açıqlasalar da, düşən qəlpə parçaları BƏƏ-nin Habşan təbii qaz müəssisəsində işlərin dayandırılmasına səbəb olub. Peyk görüntüləri isə İranın cavab zərbələri nəticəsində ABŞ və müttəfiqlərinə məxsus ən az 10 strateji radar sisteminin və 25-dən çox lojistik nöqtənin zərər gördüyünü təsdiqləyir.
Diplomatik cəbhədə isə Türkiyə və Fransa aktiv sülh səylərini davam etdirir. Türkiyənin xarici işlər naziri Hakan Fidan regional tur çərçivəsində Ər-Riyaddan sonra bu gün Qətərə səfər edərək sülh diplomatiyasını davam etdirir. Fransa isə Livan və İsrail arasında hərbi əməliyyatların dayandırılması üçün üç aylıq yol xəritəsi təqdim edib. Lakin hər iki tərəfin hələlik güzəştsiz mövqeyi regionda gərginliyin yaxın günlərdə daha da artacağına dair narahatlıqları gücləndirir.