BAKI, VOA, Nailə Babazadə

Səudiyyə Ərəbistanı Müdafiə Nazirliyinin sosial media hesabından verilən bəyanatda ölkənin şərq bölgəsinə yönələn yeni pilotsuz uçuş aparatı (PUA) hücumlarının qarşısının alındığı bildirilib.

VOA xəbər verir ki, açıqlamada 15 PUA-nın hava hücumundan müdafiə sistemləri tərəfindən məhv edildiyi ifadə edilsə də, dronların mənbəyi barədə məlumat verilməyib.

Eyni zamanda, ölkənin cənub-şərqində yerləşən Əl-Xarc vilayətinə doğru istiqamət alan bir balistik raketin aşkar edildiyi və müdafiə sistemləri tərəfindən zərərsizləşdirildiyi qeyd olunub. Bildirilib ki, raketin bəzi qalıqları Şahzadə Sultan Hava Bazasının ətrafına düşsə də, hər hansı dağıntı və ya itkiyə səbəb olmayıb. Səudiyyə Ərəbistanı Mülki Müdafiə İdarəsi isə Əl-Xarc vilayətində hücum təhlükəsi ilə əlaqədar həyəcan siqnallarının çalındığı barədə məlumat paylaşıb.

Xatırladaq ki, fevralın 28-də ABŞ və İsrailin İrana qarşı başlatdığı hərbi əməliyyatlardan sonra İran da buna cavab olaraq İsrail və ABŞ bazalarının yerləşdiyi regional ölkələrdəki hədəfləri atəşə tutur. İran rəsmilərinin məlumatına görə, münaqişə başlayandan bəri ölkədə ali lider Əli Xamenei də daxil olmaqla bir çox yüksək rütbəli şəxs öldürülüb, ümumi ölü sayı 1348-i keçib, yaralıların sayı isə 17 minə çatıb.