BAKI, VOA, Nailə Babazadə

İsrail ordusunun 2023-cü ilin oktyabr ayından bəri Qəzza zolağına təşkil etdiyi hücumlarda həyatını itirənlərin sayı 72 min 249 nəfərə çatıb. Atəşkəs elan edilməsinə baxmayaraq, İsrail ordusu Qəzzaya qarşı hücumlarını davam etdirir.

VOA xəbər verir ki,Qəzzadakı Səhiyyə Nazirliyindən verilən yazılı açıqlamada 2023-cü ilin oktyabrından bəri davam edən hücumlardakı itkilərlə bağlı son məlumatlar paylaşılıb. Son 24 saat ərzində Qəzzadakı xəstəxanalara 2 cənazə və 20 yaralının gətirildiyi qeyd edilib. Atəşkəsin qüvvəyə mindiyi 10 oktyabr 2025-ci il tarixindən bu yana İsrailin hücumları nəticəsində 673 nəfərin öldürüldüyü, 1799 nəfərin yaralandığı, dağıntılar altından isə 756 cənazənin çıxarıldığı ifadə edilib. Ümumilikdə isə yaralı sayının 171 min 898-ə yüksəldiyi bildirilib. Dağıntılar altında hələ də minlərlə cənazənin qaldığı ehtimal edilir.

Digər tərəfdən, İsrail ordusunun Qəzza zolağının cənubundakı Xan Yunus şəhərində bir avtomobili pilotsuz uçuş aparatı (PUA) ilə hədəf alması nəticəsində ilkin məlumatlara görə biri uşaq olmaqla 3 nəfər həyatını itirib, 14 nəfər yaralanıb. Fələstin Qızıl Aypara Cəmiyyətinə bağlı Əl-Mövasi Sahra Xəstəxanasından alınan məlumata görə, hücum birbaşa mülki nəqliyyat vasitəsinə yönəlib.