BAKI, VOA, Nailə Babazadə

İsrail ordusunun Livanın cənubu, Bekaa bölgəsi və paytaxt Beyruta təşkil etdiyi son hava hücumları nəticəsində 5 nəfərin həyatını itirdiyi bildirilib.

VOA xəbər verir ki, Livanın rəsmi NNA agentliyinin məlumatına görə, ölkənin cənubundakı Sur şəhərində İsrailə məxsus pilotsuz uçuş aparatı (PUA) bir avtomobili hədəf alıb və nəticədə 1 nəfər dünyasını dəyişib. Eyni zamanda, Bekaa bölgəsinin Ber Elyas rayonunda bir mənzilə endirilən zərbə nəticəsində "Camaat-i İslami" təşkilatının rəsmisi Yusuf ed-Dahukun iki oğlu həlak olub, özü isə ağır yaralanıb.

Hücum coğrafiyası genişlənərək Nəbatiyə vilayətinin Aba kəndində bir evi də hədəf alıb; burada bir qadın həyatını itirib, həyat yoldaşı isə xəsarət alıb. Paytaxt Beyrutun cənubundakı Dahiye bölgəsinin Cenah məhəlləsində bir avtomobilin vurulması isə daha bir can itkisinə səbəb olub. Bundan əlavə, İsrail ordusunun Şeba bölgəsinə təşkil etdiyi PUA hücumunda bir çobanın yaralandığı qeydə alınıb. Şeba bölgəsi İsrailin hərbi nəzarət məntəqələri vasitəsilə yerli sakinlərin hərəkətini məhdudlaşdırdığı strateji nöqtələrdən biri kimi tanınır.

İsrail ordusu Beyrutun cənubundakı Hureyk, Qubeyri və Burc əl-Baracine kimi bir çox məhəllə üçün təxliyə əmrini və hücum hədələrini təkrarlayıb. Ordu sözçüsü Aviçay Adrae sakinlərin evlərini təcili tərk etmələrini, əks halda həyatlarının təhlükədə olacağını bildirib. Livan hökumətinin məlumatına görə, İsrailin davam edən intensiv hücumları və mütəmadi təhdidləri səbəbindən ölkə daxilində məcburi köçkün vəziyyətinə düşənlərin sayı artıq 1 milyona çatıb. Bu, regionda son onilliklərin ən böyük humanitar böhranlarından biri kimi qiymətləndirilir.