BAKI, VOA, Nailə Babazadə
Livan hökuməti İranın Beyrutdakı səfirliyinin nümayəndəsini rəsmi izahat üçün Xarici İşlər Nazirliyinə çağırıb.
VOA xəbər verir ki, bu barədə Livanın informasiya naziri açıqlama verib.
Nazirin sözlərinə görə, bu addım İranın "Təsnim" xəbər agentliyinin İslam İnqilabı Keşikçiləri Korpusu (SEPAH) və "Hizbullah"ın Livan ərazisindən birgə əməliyyat keçirməsi barədə yaydığı məlumatdan sonra atılıb. Livan rəsmiləri bu növ hərbi fəaliyyətlərin ölkənin suverenliyi və daxili təhlükəsizliyi kontekstində ciddi araşdırılacağını və lazımi hüquqi-diplomatik tədbirlərin görüləcəyini bildiriblər.
Qeyd edək ki, Beyrut və Tehran arasında artan gərginlik fonunda İsrail ordusunun Livan ərazisinə endirdiyi hava zərbələri də şiddətlənir.
Son rəsmi məlumatlara görə, hücumlar başlayandan bəri 687 nəfər həyatını itirib. Ölənlərin 98-i uşaq, 52-si isə qadındır.
Beynəlxalq konvensiyalarla qorunan tibbi heyət də hədəf alınıb. Humanitar missiyanı yerinə yetirən personaldan 15 nəfər şəhid olub, 45 nəfər isə müxtəlif dərəcəli bədən xəsarətləri alıb.
Livan rəhbərliyi beynəlxalq birliyi mülki əhalinin və tibb işçilərinin hədəf alınmasını dayandırmaq üçün təzyiqləri artırmağa çağırıb.