BAKI,VOA,Fərid Mikayılov

İraqda həyata keçirilən hava zərbələri nəticəsində İranla əlaqəli silahlı qruplaşmanın bir neçə üzvünün öldürüldüyü bildirilib.

VOA xəbər verir ki, Şimali İraqda İranın dəstəklədiyi və əsasən şiə qüvvələrindən ibarət olan “Xalq Səfərbərlik Qüvvələri” (PMF) ilə əlaqəli “Kətaib İmam Əli” qruplaşması hava hücumları nəticəsində 4 üzvünün öldüyünü, 12 nəfərin isə yaralandığını açıqlayıb.

Qruplaşma hücumun ABŞ tərəfindən həyata keçirildiyini iddia edərək hadisəni “Amerikanın təcavüzü” kimi qiymətləndirib. Zərbənin Kərkük vilayətinin Dibis rayonunda yerləşən mövqelərdən birinə endirildiyi bildirilib.

İraq hökumətinin təhlükəsizlik üzrə informasiya mərkəzi də Kərkükdə baş verən bombardman nəticəsində PMF üzvlərinin öldüyünü təsdiqləyib, lakin hücumun kim tərəfindən həyata keçirildiyini açıqlamayıb.

Hadisə fonunda İranın İnqilab Keşikçiləri Korpusu İraqda yerləşən Əl-Harir hərbi hava bazasına raket zərbəsi endirildiyini bildirib.

Qurumun yaydığı açıqlamada ABŞ hərbçilərinin yerləşdiyi baza istiqamətində beş raketin atıldığı qeyd olunub.

İraqın Baş naziri Məhəmməd Şiə əs-Sudani ABŞ dövlət katibi Marko Rubio ilə telefon danışığında ölkəsinin regiondakı müharibədə istifadə olunan platformaya çevrilməməli olduğunu vurğulayıb.

Sudani bildirib ki, İraqın hava məkanı, ərazisi və suları qonşu ölkələrə qarşı hərbi əməliyyatlar üçün istifadə edilməməlidir.

Yaxın Şərqdə ABŞ və İsrailin fevralın 28-də İrana qarşı başladığı hərbi əməliyyatlardan sonra İraqda gərginlik daha da artıb.

Son günlər Bağdad beynəlxalq hava limanı, ABŞ hərbçilərinin yerləşdiyi bazalar, həmçinin neft infrastrukturu və müxtəlif obyektlər dron və raket hücumlarının hədəfinə çevrilib.

Analitiklərin fikrincə, Yaxın Şərqdə genişlənən hərbi qarşıdurma fonunda İraq yenidən ABŞ və İran arasında geosiyasi qarşıdurmanın əsas meydanlarından birinə çevrilir.