BAKI, VOA, Nailə Babazadə

Diqqət ABŞ və İsrailin İrana qarşı apardığı müharibəyə yönəldiyi bir vaxtda, Qəzza zolağı getdikcə daha mürəkkəb şərtlərlə üz-üzə qalır. Ötən ilin oktyabrında əldə edilmiş atəşkəs şərtlərinin icrasına yönəlmiş siyasi səylər dondurulub, bu isə bölgədəki humanitar böhranı daha da dərinləşdirir.

VOA xəbər verir ki, HƏMAS və digər Fələstin qruplaşmaları "Tramp planı"nın ikinci mərhələsinə keçməyə ümid etsələr də, İranla müharibənin nəticələri bu yolu qeyri-müəyyənliyə itələyib. Atəşkəs sazişindən bəri İsrail bir neçə mühüm addımı gecikdirir. Rəsmi Təl-Əviv Qəzzanın idarə edilməsi üçün yaradılan "Milli Komitə"nin anklava daxil olmasına mane olur və qruplaşmaların tərksilah edilməsi üçün təzyiqləri artırır. Eyni zamanda, Vaşinqtonun xahişi ilə açılmış keçid məntəqələri yenidən bağlanıb.

"Asharq Al-Awsat" qəzetinə danışan HƏMAS mənbələri bildiriblər ki, Qətər və Türkiyə kimi vasitəçilər hazırda daha çox İran–ABŞ müharibə böhranı ilə məşğuldurlar. Hərəkat hazırda əsasən Misir vasitəçisi ilə təmasdadır. ABŞ administrasiyası ilə isə İranla müharibə başlayandan bəri, istər birbaşa, istərsə də vasitəçilər vasitəsilə heç bir yeni kommunikasiya qurulmayıb.
"Hamas"ın diplomatik susqunluğu

İranın ali lideri Əli Xameneyinin öldürülməsini və Tehrana edilən hücumları pisləyən "Hamas", Körfəz ölkələrinə edilən raket zərbələri barədə rəsmi sükut nümayiş etdirir. Hərəkat rəhbərliyi həm Körfəz dövlətləri ilə münasibətləri qorumaq, həm də regional münaqişəyə daha dərindən cəlb olunmamaq üçün ehtiyatlı davranır. Mənbələr bildirir ki, hərəkat rəhbərliyi gələcəkdə onlara qarşı istifadə oluna biləcək kəskin mövqe tutmaqdan çəkinir.

Qəzza daxilində İranın hücumlarına münasibət fərqlidir. Sahə səviyyəsində müxtəlif fikirlər olsa da, "Hamas"ın rəsmi media platformalarında İranın narrativinə güclü dəstək verilir və məscidlərdə Tehranın qələbəsi üçün dualar edilir.

Eyni zamanda, hərəkat rəhbərliyi İsrailin sürpriz sui-qəsd hücumlarından ehtiyatlanaraq təhlükəsizlik tədbirlərini ən yüksək səviyyəyə qaldırıb. Xatırladaq ki, cümə axşamı Livandakı əl-Bədavi qaçqın düşərgəsinə endirilən zərbə nəticəsində "İzzəddin əl-Qəssam" briqadasının komandirlərindən biri Vəsim əl-Əli həlak olub.