BAKI, VOA, Orxan Qədirzadə
ABŞ və İran arasında növbəti nüvə danışıqları İsveçrənin Cenevrə şəhərində baş tutub.
VOA xəbər verir ki, ABŞ və İran nümayəndə heyətləri Cenevrədə nüvə proqramı ilə bağlı danışıqların üçüncü raundunu keçiriblər. Məlumata görə, ABŞ Prezidenti Donald Tramp İranın nüvə proqramını məhdudlaşdıracaq razılaşmanın əldə olunmasında maraqlıdır və hazırkı vəziyyəti diplomatik irəliləyiş üçün fürsət kimi dəyərləndirir.
Bildirilib ki, ötən ilin iyun ayında ABŞ-ın İrandakı üç nüvə obyektinə zərbə endirməsindən sonra Tehran nüvə proqramını davam etdirmək niyyətində olduğunu bəyan edib və uranın zənginləşdirilməsini dayandırmayacağını açıqlayıb.
Danışıqlar fonunda ABŞ-ın Yaxın Şərqə hərbi təyyarələr və hərbi gəmilər cəlb etdiyi qeyd olunur. Bu addımın Tehrana təzyiq vasitəsi kimi qiymətləndirildiyi bildirilir.
İran tərəfi isə mümkün hərbi əməliyyat baş verəcəyi təqdirdə Yaxın Şərqdə yerləşən ABŞ hərbi bazalarının hədəf ola biləcəyini bəyan edib. Rəsmi Tehran İsrailə qarşı da cavab tədbirlərinin mümkünlüyünü istisna etməyib ki, bu da regionda genişmiqyaslı qarşıdurma riskini artırır.
İranın xarici işlər naziri Abbas Əraqçi Hindistan mediasına müsahibəsində bildirib ki, belə bir müharibədə heç bir tərəf qalib olmayacaq və bu, region üçün dağıdıcı nəticələr doğura bilər. Onun sözlərinə görə, ABŞ bazalarının region boyunca səpələnməsi qarşıdurma halında bütün Yaxın Şərqin münaqişəyə cəlb olunması riskini yaradır.
Omanın Xarici İşlər Nazirliyi isə ABŞ-ın Yaxın Şərq üzrə xüsusi nümayəndəsi Stiv Uitkof və Donald Trampın kürəkəni Cared Kuşnerin Oman xarici işlər naziri Bədr əl-Busaidi ilə görüşünə dair məlumat yayıb. Görüşün Cenevrədə, Oman diplomatik nümayəndəliyinin iqamətgahında keçirildiyi bildirilir.
Məlumata görə, Abbas Əraqçi də Cenevrəyə səfəri çərçivəsində Bədr əl-Busaidi ilə görüşüb. Oman tərəfi əvvəlki raundlarda razılaşdırılmış prinsiplər əsasında İranın təqdim edəcəyi təkliflərin müzakirə olunduğunu açıqlayıb. Bildirilir ki, Oman XİN rəhbəri İranın mövqeyini ABŞ tərəfinə çatdıracaq.