BAKI, VOA, Nailə Babazadə

İsrail Müdafiə Nazirliyi Qüds və Məscid-i Əqsadakı hadisələri işıqlandıran 5 Fələstin media şəbəkəsinin fəaliyyətini rəsmən qadağan edib.

VOA xəbər verir ki, İsrail müdafiə naziri Yisrael Katz, ərəb dilində yayımlanan "El-Asima el-İhbariye", "Miraç", "Kudüs Pusulası", "Kudüs Meydanı" və "Kudüs Plus" adlı platformaların "terror siyahısına" alınması barədə qərarı imzalayıb. İsrail Baş prokuroru isə bu qərarın icrası üçün heç bir hüquqi maneənin olmadığını təsdiqləyib.

İsrailin "Kanal-12" televiziyasının məlumatına görə, bu addım daxili kəşfiyyat xidməti olan Şin-Bet (Şabak) tərəfindən irəli sürülüb. Kəşfiyyat xidməti yüz minlərlə izləyicisi olan bu platformaların "HƏMAS"-ın bir qolu kimi fəaliyyət göstərdiyini iddia edir. Qadağa qərarının rəsmi əsası kimi isə həmin media orqanlarının Qüds şəhəri və Məscid-i Əqsa ətrafındakı hadisələrlə bağlı "təxribat xarakterli yayımlar" etməsi göstərilib. Maraqlı məqam ondan ibarətdir ki, qadağan olunan bu şəbəkələrin mərkəzi ofisləri Qüds şəhərində yerləşmir.

Qadağa tətbiq edilən platformalardan biri olan "El-Asima el-İhbariye" yayımladığı yazılı bəyanatda İsrailin bu qərarına sərt reaksiya verib. Şirkət rəhbərliyi ikinci bir elana qədər fəaliyyətlərini dayandırdıqlarını bildirərək, bu addımın Qüdsü və Məscid-i Əqsanı təcrid etmək məqsədi daşıdığını vurğulayıb. Onlar özlərini müstəqil media platforması kimi təqdim edərək, İsrailin bu qərarını mətbuat azadlığına qarşı növbəti təzyiq və susdurma siyasəti kimi qiymətləndiriblər.