BAKI, AzerVoice, Orxan Qədirzadə

İsrail ordusunun “Merkava” tipli tankı Livanın cənubunda BMT-nin Livan Sülhməramlı Qüvvələrinin (UNIFIL) həyata keçirdiyi reyd zamanı barış qüvvələrinin hərbçilərinə atəş açıb.

AzerVoice xəbər verir ki, UNIFIL açıqlamanı rəsmi sosial media hesabında paylaşaraq insidenti BMT Təhlükəsizlik Şurasının 1701 saylı qətnaməsinin ciddi pozuntusu kimi dəyərləndirib və İsrailə hücumları dərhal dayandırmaq çağırışı edib.

Missiyanın məlumatında qeyd olunub ki, reydin marşrutu və vaxtı hadisədən əvvəl İsrail tərəfinə təqdim edilib. Bildirilir ki, barış qüvvələri Mavi Xətt boyunca sabitliyin qorunması üzrə mandat çərçivəsində fəaliyyət göstərirdi.

Hadisənin Livanın cənubundakı Serde bölgəsində baş verdiyi və tankın UNIFIL-in reyd qrupunu hədəfə aldığı təsdiqlənib. Qurum əlavə edib ki, bu, son bir ayda baş verən ikinci oxşar insidentdir — 16 noyabrda İsrail ordusu UNIFIL personalını yenidən tank atəşi ilə hədəfə almışdı.

Beynəlxalq müşahidəçilər yeni insidentin sərhəd xəttində gərginliyi daha da dərinləşdirə biləcəyini bildirirlər. İsrail tərəfindən isə hələlik rəsmi açıqlama verilməyib.