BAKI,AzerVoice

Livanda “Hizbullah” hərəkatı bazar günü ABŞ prezidenti Donald Trampın Qəzza zolağında müharibəyə son qoymaq planı ilə bağlı “HƏMAS”ın mövqeyini tam dəstəklədiyini açıqlayıb. AzerVoice xəbər verir ki,hərəkatın yaydığı bəyanatda qeyd olunub ki, “Hizbullah” “HƏMAS” və digər fələstinli müqavimət qruplarının razılaşdırılmış qərarını dəstəkləyir və bu mövqeyin İsrailin vəhşi təcavüzünün dayandırılmasına yönəlmiş ciddi səylərdən qaynaqlandığını vurğulayır.

“Bu mövqe həm Qəzza zolağında xalqımıza qarşı həyata keçirilən qəddar İsrail hücumlarının dayandırılmasına yönəlib, həm də Fələstin məsələsinin əsas prinsiplərinə sadiqliyi, fələstin xalqının hüquqlarından imtina etməmək əzmini nümayiş etdirir.”Hizbullah hesab edir ki, “HƏMAS”ın qərarı və digər fələstinli qrupların mövqeyi fələstin xalqının birliyini qorumaq və milli konsensus əsasında müzakirələr aparmaq iradəsini əks etdirir.Danışıqlar yalnız fələstin xalqının milli hüquqları əsasında və onun suveren qərarlarına hörmət çərçivəsində aparılmalıdır. Bu, işğalçı qüvvələrin Qəzzadan tam çəkilməsini, əhalinin köçürülməsinin qarşısının alınmasını və fələstinlilərin öz siyasi, təhlükəsizlik və sosial həyatlarını müstəqil şəkildə idarə etməsini təmin etməlidir,” – deyə bəyanatda qeyd olunur.

“Hizbullah” həmçinin bütün ərəb və islam ölkələrini fələstin xalqının və müqavimət qüvvələrinin yanında dayanmağa, Qəzza və İordan çayının qərb sahilindəki İsrail hücumlarının dayandırılması, məcburi köçürülmənin qarşısının alınması, Qəzzanın yenidən qurulması və fələstinlilərin qanuni milli hüquqlarının bərpası istiqamətində hərtərəfli dəstək göstərməyə çağırıb.