BAKI, AzerVoice, Fərid Mikayılov
Yəmən Silahlı Qüvvələri İsrailə qarşı yeni hücum əməliyyatı həyata keçirdiklərini, işğal altındakı Yaffa bölgəsində bir neçə həssas hədəfin “Palestine-2” tipli çoxbaşlıqlı hipersəs ballistik raketlə vurulduğunu açıqlayıb.
AzerVoice xəbər verir ki, rəsmi bəyanata görə, gecə saatlarında həyata keçirilən hücum İsrailin Yəmənə qarşı təcavüzünə və Qəzzadakı davam edən “soyqırım siyasətinə” cavab olaraq həyata keçirilib.
Yəmən qüvvələri Qırmızı dəniz və Ərəb dənizində fəaliyyət göstərən bütün mülki və hərbi şirkətləri, həmçinin həmin marşrutlardan keçən gəmiləri şəxsiyyətlərini açıqlamağa çağırıb. Əks halda onların hədəfə alınacağı və məsuliyyəti daşıyacaqları bildirilib.
Açıqlamada vurğulanıb ki, əməliyyatlar getdikcə artan tempdə davam edəcək və yalnız İsrailin Qəzzaya qarşı hücumlarını dayandırması və mühasirəni ləğv etməsi halında dayandırılacaq.
Yeni hücum İsrailin bir neçə gün öncə Yəmənin paytaxtında yaşayış məhəllələrini və mülki infrastrukturu hədəfə almasından sonra reallaşdırılıb.
Yəmən qüvvələri həmçinin strateji dəniz blokadası həyata keçirərək İsrailə hərbi resursların çatdırılmasının qarşısını almağa çalışdıqlarını, bununla yanaşı Qəzzadakı humanitar böhrana beynəlxalq diqqəti cəlb etmək istədiklərini bildirib. Eyni zamanda İsrailin işğal altındakı bölgələrində raket və PUA hücumları ilə hədəfləri vurduqlarını təsdiqləyiblər.