BAKI,AzerVoice, Fərid Mikayılov

İsrail ordusu Cənubi Livana zərbələrini genişləndirərək Mays əl-Cəbal, Kfar Tebnit, Dəbbinə, əl-Çehabiyə və Bürc Qallaviyə qəsəbələrinə hücumlar təşkil edib.

AzerVoice xəbər verir ki, zərbələrdən əvvəl sakinlərə təxliyə xəbərdarlığı edilib ki, bu da panikaya və kütləvi köçə səbəb olub.

İsrail ordusu binaların “Hizbullah tərəfindən istifadə olunduğunu” iddia edir.

Noyabrda ABŞ vasitəçiliyi ilə imzalanan atəşkəsə baxmayaraq, İsrail son aylarda İran tərəfindən dəstəklənən Hizbullaha qarşı sərhədboyu hücumlarını davam etdirir.

Baş nazir Nəvaf Salam İsrailin eskalasiyasını pisləyərək, ölkəsinin atəşkəsə sadiq qaldığını vurğulayıb. Baş nazir beynəlxalq ictimaiyyəti, İsrailə təzyiq göstərməyə çağırıb.

“İsrail dərhal hücumlarını dayandırmalı, atəşkəs mexanizminə qayıtmalı, işğal altında saxladığı ərazilərdən çıxmalı və əsirləri azad etməlidir”- deyə o bildirib.

Livan prezidenti Cozef Aun isə İsrailin hərbi əməliyyatlarını “aşkar suverenlik pozuntusu” adlandırıb.

Livan ordusu açıqlayıb ki, İsrail atəşkəs imzalandıqdan bəri təxminən 4 min 500 dəfə pozuntu edib. Ordunun bəyanatında bildirilib ki, bu hücumlar onun Cənubdakı yerləşdirilməsini əngəlləyir.

Son ayların ən böyük gərginliyində İsrail əvvəlcə Mays əl-Cəbal, Kfar Tebnit və Dəbbinə sakinlərinə xəbərdarlıq göndərib, bir saat sonra isə hava zərbələri endirib. Daha sonra oxşar xəbərdarlıqlar əl-Çehabiyə və Bürc Qallaviyəyə də edilib.