BAKI, AzerVoice, Nailə Babazadə

İsrail ordusunun bu gün səhər saatlarından etibarən Qəzza zolağının müxtəlif bölgələrinə həyata keçirdiyi hücumlar nəticəsində azı 21 fələstinli həyatını itirib.

AzerVoice xəbər verir ki, Fələstinin rəsmi xəbər agentliyi WAFA-nın bölgədəki səhiyyə mənbələrinə istinadla yaydığı məlumata görə, İsrail ordusu Qəzza zolağında fələstinlilərə qarşı hücumlarını fasiləsiz şəkildə davam etdirir.

Xan Yunis şəhərinin qərbində yerləşən Mevasi bölgəsindəki Tabəriyyə Stansiyası və Quyu 19 ətrafında məcburi köçkünlərin yaşadığı çadırlara edilən hücum nəticəsində 5 nəfər həlak olub.

Qəzza şəhərinin qərbində yerləşən Sudaniyyə bölgəsində məcburi köçkünlərin yaşadığı çadırlara təşkil edilən hücumda isə 4 fələstinli həyatını itirib.

Qəzzanın cənub-qərbindəki Tel əl-Həva məhəlləsində bir evin bombalanması nəticəsində 5 nəfər ölüb, çox sayda insan isə yaralanıb.

Qəzza zolağının mərkəzində yerləşən Bureyc düşərgəsində bir evin hədəf alınması nəticəsində 2 nəfər həyatını itirib.

Qəzzadakı Əbu Husni küçəsində bir araya toplaşmış vətəndaşlara qarşı İsrail ordusuna məxsus pilotsuz uçuş aparatları tərəfindən atəş açılıb. Hücum nəticəsində 3 nəfər ölüb, bir çox insan yaralanıb.