BAKI, AzerVoice, Səməd Əyyubov

İslam Əməkdaşlıq Təşkilatı (İƏT) İsrailin Fələstin xalqına qarşı hərbi əməliyyatlarını müzakirə etmək üçün avqustun 25-də fövqəladə iclas keçirəcək.

AzerVoice xəbər verir ki, bu barədə İƏT-in yaydığı açıqlamada bildirilib.

Məlumata görə, təşkilata üzv ölkələrin xarici işlər nazirləri İsrailin hücumlarını və Qəzzanı tam işğal etməyə dair planlarını müzakirə edəcəklər. İclasda İsrailin həyata keçirdiyi işğal, kütləvi qətl, blokada, aclıq təhlükəsi və əhalinin məcburi köçürülməsi kimi beynəlxalq hüquqa zidd addımlarına qarşı ortaq mövqenin müəyyənləşdirilməsi nəzərdə tutulur.

Xatırladaq ki, İsrail Təhlükəsizlik Kabineti avqustun 8-də bölgənin şimalında yerləşən Qəzza şəhərinin işğalına dair planı təsdiqləmişdi. Baş nazir Benyamin Netanyahu da kabinet iclasından əvvəl verdiyi açıqlamada Qəzza zolağının tam nəzarət altına alınmasının hökumətin əsas hədəfi olduğunu demişdi. İsrailin müdafiə naziri İsrael Katz isə dünən Qəzza şəhərinin işğal planını rəsmən təsdiqləyib. Plana əsasən, ilk mərhələdə təxminən bir milyon fələstinlinin cənuba köçürülməsi, şəhərin mühasirəyə alınması və intensiv hücumların ardından tam nəzarətə götürülməsi nəzərdə tutulur.

Qeyd edək ki, HƏMAS avqustun 18-də Misir və Qətərin vasitəçiliyi ilə təqdim edilən atəşkəs və əsir mübadiləsi təklifini qəbul etsə də, İsrail bu təklifə hələ cavab verməyib.