BAKI, AzerVoice, Səməd Əyyubov
Bu gün Livan hakimiyyəti fələstinli qaçqın düşərgələrindəki silahların təhvil alınmasına başlayır.
AzerVoice-un məlumatına görə, bu addım təxminən üç ay əvvəl tərəflər arasında razılaşdırılmış planın birinci mərhələsinin icrası çərçivəsində, həm də Beyrutun silahların yalnız dövlətin nəzarətində cəmləşdirilməsi istiqamətindəki səylərinin bir hissəsi olaraq həyata keçirilir.
Livan–Fələstin Dialoq Komitəsinin rəhbəri, səfir Ramiz Dəməşqiyyə hökumət tərəfindən yayılan bəyanatda bildirib: “Bu gün fələstinli düşərgələrdən silahların təhvil verilməsi prosesinin birinci mərhələsi başlayır. İlkin mərhələdə Beyrutdakı Bürc əl-Bərajnə düşərgəsindən müəyyən sayda silah təhvil veriləcək və Livan ordusunun öhdəliyinə keçəcək.”
Livan hökuməti bu ay həmçinin Hizbullahın silahlarının təhvil verilməsi ilə bağlı plan hazırlanması tapşırığını da orduya həvalə etmişdi.
Dəməşqiyyə əlavə edib ki, bu proses ilk addım olacaq və qarşıdakı həftələrdə Bürc əl-Bərajnə ilə yanaşı digər düşərgələrdə də yeni mərhələlərlə davam etdiriləcək.
Onun sözlərinə görə, bu addım mayın 21-də Livan prezidenti Cozef Aun və Fələstin prezidenti Mahmud Abbas arasında keçirilmiş sammitdə qəbul edilən qərarların icrasıdır. Sammitdə Livanın ərazi bütövlüyü, dövlət hakimiyyətinin tam tətbiqi və silah üzərində dövlətin inhisarı prinsipi bir daha təsdiqlənmişdi.
Diplomat həmçinin xatırladıb ki, mayın 25-də Livan–Fələstin Dialoq Komitəsinin baş naziri Nəvvaf Salamın sədrliyi ilə keçirilmiş iclasında hər iki tərəfin nümayəndələrinin iştirakı ilə konkret icra mexanizmi və dəqiq vaxt cədvəli hazırlanması barədə razılıq əldə olunmuşdu. Bu qərar fələstinli fraksiyaların silah məsələsinin mərhələli şəkildə tənzimlənməsinə yönəlib.
Qeyd edək ki, hazırda Livanda 493 mindən çox fələstinli qaçqın yaşayır. Onlar çətin şəraitdə, əsasən fələstinli fraksiyaların nəzarətində olan düşərgələrdə məskunlaşıblar. Bu vəziyyət 1969-cu il “Qahirə Razılaşması” əsasında formalaşmış qeyri-rəsmi razılaşmalar nəticəsində bu günə qədər davam edir.