BAKI, AzerVoice

İsrailin baş naziri Benyamin Netanyahunun Qəzzadakı fələstinlilərin deportasiya planını sürətləndirdiyi iddia olunur.

AzerVoice xəbər verir ki, İsrailin baş naziri Benyamin Netanyahunun ifrat sağçı koalisiya ortağı, milli təhlükəsizlik naziri İtamar Ben-Qvirə HƏMAS ilə atəşkəs razılaşması əldə olunmaması halında bir neçə həftə ərzində fələstinliləri Qəzza zolağından deportasiya etmək planını həyata keçirəcəyi barədə söz verdiyi iddia olunub.

İsrail rəsmiləri bu planla bağlı artıq mütəmadi görüşlərin keçirildiyini və Mossad-a deportasiya ediləcək ölkələrlə təmasların sürətləndirilməsi barədə tapşırıq verildiyini bildirib.

İddialara əsasən, Təl-Əviv rəhbərliyi fələstinlilərin Efiopiya, Liviya, İndoneziya və digər ölkələrə köçürülməsi üçün ilkin razılaşmalar əldə edib. Deportasiya planı çərçivəsində fələstinlilərin əvvəlcə İsrail və İordaniya üzərindən çıxarılması nəzərdə tutulur.

Qəzet həmçinin Netanyahunun digər ifrat sağçı nazir Bezalel Smotriçə Qəzza zolağının şimalındakı bəzi əraziləri ilhaq edəcəklərinə dair vəd verdiyini də qeyd edib.

Netanyahunun bu addımlar üçün ABŞ-la koordinasiya apardığı, strateji işlər naziri Ron Dermer, milli təhlükəsizlik müşaviri Tzachi Hanegbi və Mossad direktoru Devid Barneanı Vaşinqtona göndərdiyi bildirilib.

Xatırladaq ki, bu ideya ilk dəfə yanvar ayında ABŞ-ın keçmiş prezidenti Donald Tramp tərəfindən irəli sürülmüşdü. Trampın bəyanatından sonra İsrail rəsmiləri bu təklifi dəyərləndirməyə başladıqlarını və bəzi ölkələrlə əlaqələr qurduqlarını açıqlamışdılar.

İsrailin yeni sürgün planı çərçivəsində Qəzza sakinlərinin əvvəlcə bölgənin cənubuna, daha sonra isə üçüncü ölkələrə yönəldilməsi nəzərdə tutulur. Müşahidəçilər bu addımı etnik təmizləmə cəhdi kimi qiymətləndirirlər.