Bakı. AzerVoice:
Türkiyənin Milli Müdafiə Nazirliyi ABŞ-dan F-16-ların alınması üçün imzaların atıldığını və nümayəndə heyətləri arasında danışıqların davam etdiyini bildirib.
AzerVoice xəbər verir ki, bu barədə Milli Müdafiə Nazirliyindən edilən açıqlamada məlumat verilib.
"Müqavilələr imzalanıb. Nümayəndə heyətləri arasında qarşılıqlı danışıqlar yolu ilə onların təfərrüatları ilə bağlı müzakirələr davam edir. Qəbul ediləcək qərarların detalları haqqında ictimaiyyətə məlumat veriləcəkdir "- deyə nazirlikdən bildirilib.
Xatırladaq ki, bu il yanvarın sonunda Amerika mətbuatı Türkiyə Hərbi Hava Qüvvələri donanmasının modernləşdirilməsi ilə bağlı razılaşmaların əldə olunduğunu açıqlamışdı. Söhbət Türkiyəyə 40 ədəd “F-16 Blok 70” təyyarəsinin verilməsi və Türkiyə ordusunda xidmət edən daha 79 ABŞ qırıcısının modernləşdirilməsindən gedirdi.
