BAKI,VOA, Orxan Qədirzadə

İran, ABŞ, Pakistan və Qətər nümayəndələrinin iştirakı ilə dördtərəfli görüşün günün ikinci yarısında keçirilməsi planlaşdırılır.

Bu barədə İran Xarici İşlər Nazirliyinin rəsmi nümayəndəsi və danışıqlar qrupunun rəhbəri İsmayıl Bəqai İsveçrənin Bürgenştok bölgəsində İran və ABŞ arasında imzalanmış memorandumun icrası ilə bağlı keçirilən ilk texniki müzakirələri şərh edərkən məlumat verib.

Onun sözlərinə görə, dördtərəfli görüşdən əvvəl İran nümayəndə heyəti Pakistan və Qətərdən olan vasitəçilərlə ayrıca danışıqlar aparacaq.

İsmayıl Bəqai bildirib ki, qarşıdakı müzakirələrin əsas məqsədi bölgədəki münaqişənin dayandırılması və tərəflər arasında imzalanmış memorandumun praktik icrasının təmin edilməsidir.

İran rəsmisi eyni zamanda İsrail tərəfindən atəşkəs rejiminin pozulmasının davam etdiyini vurğulayıb. O qeyd edib ki, bu məsələ danışıqların əsas mövzularından biri olacaq və görüşlər zamanı ətraflı şəkildə müzakirə ediləcək.

Bəqainin sözlərinə görə, tərəflər arasında aparılacaq danışıqlarda İranın xaricdə dondurulmuş maliyyə aktivlərinin açılması məsələsi də gündəmdə olacaq. Bundan əlavə, İran neftinin beynəlxalq bazarlara satışına icazə verilməsi ilə bağlı mövzuların da müzakirəyə çıxarılması nəzərdə tutulur.

İsveçrədə keçirilən görüşlər regionda son aylarda yaşanan gərginliyin azaldılması, iqtisadi məhdudiyyətlərin aradan qaldırılması və tərəflər arasında əldə olunmuş razılaşmaların həyata keçirilməsi baxımından mühüm mərhələ kimi qiymətləndirilir.