BAKI,VOA, Fərid Mikayılov

İranın xarici işlər naziri Abbas Əraqçi Livan prezidenti Cozef Aunun Tehranın ölkənin daxili işlərinə qarışmaması ilə bağlı çağırışına sərt reaksiya verib.

VOA xəbər verir ki, Əraqçi sosial şəbəkədə paylaşdığı açıqlamada Aunun bəyanatlarını tənqid edərək bildirib ki, onun fikirlərindən belə çıxır ki, guya Livan ərazilərini işğal edən, əhalini didərgin salan və ölkəni hər gün bombardman edən tərəf İrandır.

İranlı nazir qeyd edib ki, əgər Livan Tehran üçün danışıqlarda istifadə olunan vasitə olsaydı, artıq çoxdan razılaşma əldə edilərdi.

“Cənab Prezident, Livanı əsl düşməninizdən xilas edin”, - deyə Əraqçi vurğulayıb.

Bundan əvvəl CNN-ə müsahibəsində Livan prezidenti Cozef Aun İranı ölkəsinin daxili işlərinə müdaxilə etməməyə çağırmışdı. O bildirmişdi ki, Livanın taleyi livanlıların məsuliyyətidir və xarici tərəflər ölkənin daxili məsələlərinə qarışmamalıdır.

Livanın baş naziri Nəvaf Salam da İranı Livandan ABŞ ilə aparılan danışıqlarda təzyiq vasitəsi kimi istifadə etməməyə çağırıb.

Qeyd edək ki, İsrail ilə İranın dəstəklədiyi Hizbullah arasında davam edən qarşıdurma fonunda Livanda vəziyyət gərgin olaraq qalır.