BAKI,VOA Yusif Şərifzadə
Tehran, BRICS üzv dövlətlərini ABŞ və İsrailin beynəlxalq hüququ davamlı şəkildə pozduğunu iddia etdiyi addımları pisləməyə çağırıb.
VOA xəbər verir ki, İranın xarici işlər naziri Abbas Əraqçi bildirib: “Qərbin saxta üstünlük və toxunulmazlıq hissi hamımız tərəfindən sarsıdılmalı və dağıdılmalıdır.”
Nazir əlavə edib: “Dəhşətli zorakılıq qarşısında İran xalqı qətiyyətlə və qürurla öz mövqeyini qoruyub. Biz müstəqillik ideallarımızdan geri çəkildikmi? Biz imperial güclərin iradəsinə və istəklərinə təslim olduqmu? Cavab aydındır: Xeyr, olmadıq və heç vaxt da olmayacağıq.”
Əraqçi həmçinin qeyd edib: “Bu məsələ BRICS+ ölkələri üçün də əhəmiyyətlidir, çünki İranın apardığı mübarizə hamımızın – birlikdə qurduğumuz yeni dünyanın müdafiəsi naminə aparılıb.”
BRICS ölkələrinə Braziliya, Rusiya, Hindistan, Çin, Cənubi Afrika, Misir, Efiopiya, İran, Birləşmiş Ərəb Əmirlikləri, Səudiyyə Ərəbistanı və İndoneziya daxildir.