BAKI,VOA, Orxan Qədirzadə

Yaxın Şərqdə gərginlik fonunda ABŞ-ın İrana qarşı mümkün hərbi planları ilə bağlı yeni detallar ortaya çıxıb.

VOA xəbər verir ki, KİV-in yaydığı məlumata görə, ABŞ Mərkəzi Komandanlığı İrana qarşı qısa müddətli, lakin intensiv zərbələrdən ibarət hərbi əməliyyat planı hazırlayıb.

Məlumata əsasən, planın əsas hədəfi İran ərazisində yerləşən müəyyən infrastruktur obyektlərinə yönəlmiş zərbələri əhatə edir. Mənbələr bildirir ki, bu ssenari hazırkı danışıqlarda yaranmış durğunluğu aradan qaldırmaq məqsədi daşıyır.

Eyni zamanda qeyd olunur ki, ABŞ hərbi rəhbərliyi cümə günü prezident Donald Trampa İranla bağlı yeni hərbi variantları təqdim edəcək. Təklif olunan planların regionda güc balansına və diplomatik proseslərə ciddi təsir göstərə biləcəyi istisna edilmir.

Analitiklər hesab edirlər ki, belə bir addım Yaxın Şərqdə eskalasiyanı sürətləndirə, eyni zamanda enerji bazarlarında qeyri-müəyyənliyi artıra bilər.

Rəsmi Vaşinqton tərəfindən məsələ ilə bağlı hələlik yekun qərar açıqlanmasa da, beynəlxalq ictimaiyyət mümkün hərbi ssenariləri diqqətlə izləyir.